काठमाडौं । तिब्बततर्फबाट आएको भीषण बाढी रसुवास्थित भोटेकोसी नदीमा मिसिएपछि रसुवासँगै नुवाकोट र धादिङलगायत तल्लो तटीय क्षेत्रमा पनि ठूलो क्षति पुगेको छ। बाढीको प्रभाव जलविद्युत् आयोजनाहरूमा समेत परेको छ।

प्रारम्भिक विवरणअनुसार दुई जलविद्युत् आयोजनामा कार्यरत ७८ जना कर्मचारी तथा कामदार सम्पर्कविहीन भएका छन्। केही आयोजनाका कर्मचारी तथा विदेशी नागरिक सुरक्षित स्थानमा रहे पनि उद्धारको प्रतीक्षामा रहेको जनाइएको छ।

अपर त्रिशूली–१ मा १८ जना सम्पर्कविहीन

२१६ मेगावाट क्षमताको अपर त्रिशूली–१ जलविद्युत् आयोजनामा ८ जना कोरियन नागरिक र १० जना कर्मचारी सम्पर्कविहीन भएका छन्।

त्यस्तै, आयोजनास्थलमा रहेका करिब २०० जना कामदार र १० जना कोरियन नागरिक विद्युत् गृह नजिक उद्धारको प्रतीक्षामा रहेका छन्। बाढीका कारण सडक तथा अन्य सम्पर्क मार्ग प्रभावित भएपछि उनीहरूको उद्धार चुनौतीपूर्ण बनेको बताइएको छ।

लाङटाङ खोला जलविद्युत्मा ६० जना सम्पर्कविहीन

त्यसैगरी, २० मेगावाट क्षमताको लाङटाङ खोला जलविद्युत् आयोजनामा पनि ठूलो संख्यामा कर्मचारी र कामदार सम्पर्कविहीन भएका छन्।

परीक्षण उत्पादनको चरणमा रहेको उक्त आयोजनामा कार्यरत २५ जना कर्मचारी र ३५ जना कामदार गरी ६० जना सम्पर्कविहीन रहेको प्रारम्भिक जानकारी प्राप्त भएको छ।

भोटेकोसी र त्यससँग जोडिएका नदी प्रणालीमा आएको अस्वाभाविक बाढीले जलविद्युत् आयोजना, पहुँच सडक, पुल तथा प्रसारण संरचनामा समेत क्षति पुर्‍याएको छ। प्रभावित आयोजना क्षेत्रमा रहेका कर्मचारी तथा कामदारको खोजी र उद्धारका लागि सुरक्षा निकाय तथा सम्बन्धित निकायहरू परिचालित रहेका छन्।

बाढीबाट जलविद्युत् क्षेत्रमा भएको वास्तविक भौतिक तथा आर्थिक क्षतिको पूर्ण विवरण भने अझै संकलन भइरहेको छ।

Originally published on abcnews.com.np.