काठमाडौं । मनसुन सक्रिय रहेका बेला देशका केही स्थानमा आज भारी वर्षाको सम्भावना रहेको जल तथा मौसम विज्ञान विभागले जनाएको छ ।
मनसुनको न्यूनचापीय रेखा सरदर स्थानभन्दा केही उत्तरतर्फ नेपालको तराई भूभागनजिक रहेकाले भारी वर्षाको सम्भावना बढेको विभागको भनाइ छ ।
कहाँ–कहाँ पर्छ भारी वर्षा ?
दिउँसो कोसी, वाग्मती र गण्डकी प्रदेशका हिमाली र पहाडी भूभाग तथा लुम्बिनी र सुदूरपश्चिम प्रदेशको पहाडी र तराई भूभागका एकदुई स्थानमा भारी वर्षा हुन सक्ने विभागले जनाएको छ ।
राति कोसी, वाग्मती र गण्डकी प्रदेशका हिमाली र पहाडी भूभाग तथा मधेस प्रदेशको एकदुई स्थानमा भारी वर्षाको सम्भावना रहेको छ ।
मेघगर्जन र चट्याङको पनि जोखिम
दिउँसो देशभर साधारणतया बादल लाग्ने र हिमाली भूभागका केही स्थानमा मध्यमसम्मको वर्षा तथा हिमपात हुन सक्ने अनुमान गरिएको छ ।
पहाडी भूभागका धेरै स्थानमा मेघगर्जन र चट्याङसहित मध्यम वर्षाको सम्भावना छ । तराई भूभागका केही स्थानमा पनि चट्याङसहित मध्यम वर्षा हुने विभागको पूर्वानुमान छ ।
राति देशभर बादल लाग्ने क्रम जारी रहने छ । कोसी, वाग्मती, गण्डकी, लुम्बिनी, कर्णाली र सुदूरपश्चिम प्रदेशका हिमाली भूभागका थोरै स्थानमा मध्यम वर्षा तथा हिमपात हुन सक्ने विभागले जनाएको छ ।
यसैगरी राति कोसी, वाग्मती, गण्डकी र लुम्बिनी प्रदेशका पहाडी र तराई भूभाग, मधेस प्रदेशका धेरै स्थान, कर्णाली प्रदेशका पहाडी भूभाग र सुदूरपश्चिम प्रदेशका पहाडी तथा तराईका केही स्थानमा मेघगर्जन र चट्याङसहित मध्यम वर्षाको सम्भावना रहेको छ ।
Originally published on abcnews.com.np.
प्रतिक्रिया दिनुहोस्