काठमाडौं। पशुपतिनाथ मन्दिरमा दैनिक अभिषेक र जलस्नानका लागि बागमती नदीको मुहान वाग्द्वारबाटै शुद्ध पानी ल्याउने तयारी सुरु भएको छ। पशुपति क्षेत्र विकास कोषले स्थानीय तहसँगको समन्वयमा करिब २१ किलोमिटर पाइपलाइनमार्फत शिवपुरी नागार्जुन राष्ट्रिय निकुञ्जस्थित वाग्द्वारको पानी पशुपतिसम्म ल्याउने सम्भावनाबारे प्रारम्भिक गृहकार्य थालेको हो।

हाल बागमती नदीको पानी प्रदूषित भएकाले मन्दिर परिसरको इनारको पानी अभिषेकका लागि प्रयोग हुँदै आएको छ। यही अवस्थालाई ध्यानमा राख्दै कोषले पशुपतिमा अर्पण गरिने जल शुद्ध बनाउन वाग्द्वारबाटै पानी ल्याउने विकल्पमा छलफल अघि बढाएको हो।

पशुपति क्षेत्र विकास कोषका सदस्यसचिव तीर्थ श्रेष्ठका अनुसार वाग्द्वारदेखि पशुपतिसम्म पाइपलाइन विस्तार गर्ने विषयमा प्रारम्भिक छलफल सुरु भएको छ। प्राविधिक सर्वेक्षण र विस्तृत परियोजना प्रतिवेदन (डीपीआर) तयार भएपछि मात्रै आयोजना कार्यान्वयनतर्फ अघि बढाइने उनले बताए।

स्थानीय तहले पनि यो योजनामा सहयोग गर्ने प्रतिबद्धता जनाएको छ। कोषका पूर्व सदस्यसचिव डा. मिलनकुमार थापाका अनुसार गोकर्णेश्वर, बुढानीलकण्ठ र कागेश्वरी मनोहरा नगरपालिकासँग समन्वय गरी बागमतीको मुहान क्षेत्रबाट पानी ल्याउने कार्ययोजना अघि बढाइएको छ।

गोकर्णेश्वर नगरपालिकाका प्रमुख दीपककुमार रिसालले आयोजनाका लागि नगरपालिकाले एक करोड रुपैयाँ र बागमती प्रदेश सरकारले पाँच करोड रुपैयाँ उपलब्ध गराउने सुनिश्चित गरिसकेको बताए। तर शिवपुरी नागार्जुन राष्ट्रिय निकुञ्जको सहमति र आवश्यक कानुनी प्रक्रिया पूरा हुन नसक्दा योजना अघि बढ्न नसकेको उनको भनाइ छ।

उनका अनुसार यसअघि पनि समझदारी भएको भए पनि प्राविधिक र कानुनी अड्चनका कारण आयोजना रोकिएको थियो। नगरपालिकाले निकुञ्जलाई पुनः पत्राचार गरिसकेको र आवश्यक स्वीकृति प्राप्त हुनासाथ काम अघि बढाउने तयारी गरेको जनाएको छ।

यता शिवपुरी नागार्जुन राष्ट्रिय निकुञ्जले भने आयोजनाका लागि आफ्नो पूर्वस्वीकृति अनिवार्य हुने स्पष्ट पारेको छ। निकुञ्जका संरक्षण अधिकृत तथा सूचना अधिकारी शिवलाल गैरेले सम्भाव्यता अध्ययनका लागि अनुमति लिइएको हुन सक्ने भए पनि आयोजना कार्यान्वयनका लागि हालसम्म कुनै औपचारिक सहमति नभएको बताए।

उनले निकुञ्ज क्षेत्रभित्रको प्राकृतिक स्रोत उपयोग गर्नुअघि कानुनअनुसार निकुञ्ज प्रशासनको अनुमति आवश्यक पर्ने उल्लेख गर्दै स्वीकृति दिने वा नदिने निर्णय कानुनी प्रावधान, वातावरणीय प्रभाव र कार्यालयको निर्णयका आधारमा हुने बताए। धार्मिक महत्वसँगै निकुञ्जको पर्यावरणीय सन्तुलनलाई पनि ध्यान दिनुपर्ने उनको भनाइ छ।

Originally published on abcnews.com.np.