काठमाडौं । अर्थमन्त्री डा. स्वर्णिम वाग्लेले नेपाल राष्ट्र बैंकलाई केवल नियामक संस्थाको भूमिकामा सीमित नरही मुलुकको आर्थिक रूपान्तरणको प्रमुख सहयात्री र सह–निर्माताका रूपमा अघि बढ्न आग्रह गरेका छन्।

बुधबार नेपाल राष्ट्र बैंकका कार्यकारी निर्देशकहरूसँग भएको छलफलमा अर्थमन्त्री वाग्लेले अबको नियमन नियन्त्रणमुखीभन्दा उत्पादनशील आर्थिक गतिविधिलाई प्रोत्साहन गर्ने दिशामा केन्द्रित हुनुपर्ने बताए। निजी क्षेत्रले अहिले सहुलियतभन्दा बढी नीतिगत स्पष्टता, स्थिर नियम र विश्वसनीय कार्यान्वयनको अपेक्षा गरिरहेको उल्लेख गर्दै उनले सरकार र नियामक निकायले त्यसअनुसार काम गर्नुपर्ने धारणा राखे।

विगत एक दशकका आर्थिक नीतिहरूको समीक्षा गर्दै उनले नीतिगत निर्णय भए पनि कार्यान्वयनमा अपेक्षित सफलता किन प्राप्त हुन सकेन र निजी क्षेत्र किन प्रतिरक्षात्मक अवस्थामा पुग्यो भन्ने विषयमा गम्भीर समीक्षा आवश्यक रहेको बताए।

अर्थमन्त्री वाग्लेले बैंकिङ प्रणालीमा तरलता बढ्दो भए पनि उद्योग तथा उत्पादनशील क्षेत्रमा कर्जा प्रवाह अपेक्षाअनुसार हुन नसकेको र पुँजी बजार तथा वास्तविक अर्थतन्त्रबीचको सम्बन्ध कमजोर रहेको उल्लेख गर्दै आगामी दशकको आर्थिक नीति यिनै चुनौती समाधानमा केन्द्रित हुनुपर्ने बताए। चालु आर्थिक वर्षको बजेटलाई उनले आर्थिक सुधार र संरचनागत रूपान्तरणको मार्गचित्रका रूपमा व्याख्या गर्दै राष्ट्र बैंकले पनि आफ्नो भूमिका सोहीअनुरूप पुनर्परिभाषित गर्नुपर्ने बताए।

उनले राष्ट्र बैंकका अधिकारीहरूलाई समस्या व्यवस्थापन गर्ने नियामकभन्दा समस्या समाधान गर्ने नियामक बन्न आग्रह गर्दै उत्पादनमुखी क्षेत्रमा कर्जा प्रवाह विस्तार, अधिक तरलतालाई उद्योग र रोजगारीमा परिचालन तथा पुँजी बजार, घरजग्गा र बैंकिङ प्रणालीबीच स्वस्थ सम्बन्ध कायम गर्न नयाँ नीतिगत पहल आवश्यक रहेको बताए।

अर्थमन्त्रीले डिजिटल वित्त, फिनटेक, स्टार्टअप तथा नयाँ वित्तीय उपकरणहरूको विकासलाई सहज बनाउने, मौद्रिक र वित्तीय नीतिबीच प्रभावकारी समन्वय गर्ने तथा ‘यो सम्भव छैन’ भन्ने सोच त्यागेर समाधानमुखी दृष्टिकोण अपनाउनुपर्नेमा पनि जोड दिए।

उनले सरकार, नेपाल राष्ट्र बैंक र निजी क्षेत्र एउटै दिशा र गतिमा अघि बढ्न सके आर्थिक वृद्धिको लक्ष्य हासिल गर्न कठिन नहुने विश्वास व्यक्त गर्दै छलफलबाट आएका सुझावलाई कार्ययोजनामा रूपान्तरण गरिने र आवश्यक परे संयुक्त कार्यदल गठन गरेर निर्णय प्रक्रियालाई थप प्रभावकारी बनाइने प्रतिबद्धता जनाए।

Originally published on abcnews.com.np.