झापा, २९ चैत । अवैध बाटो प्रयोग गरी नेपाली युवतीलाई भारत लैजाने दुई युवकलाई सशस्त्र प्रहरीले पक्राउ गरेको छ ।

भद्रपुर ४ स्थित ज्ञानेचोक निवासी २४ बर्षीय युवतीलाई अवैध बाटो प्रयोग गरी भारत लैजाने कचनकवल गाँउपालिका ७ निवासी ३२ बर्षीय हर्कबहादुर लिम्बु र सोही ठाँउका २८ बर्षीय अम्मरबहादुर भुजेललाई सशस्त्र प्रहरीले पक्राउ गरेको हो ।

कचनकवल गाँउपालिका ७ स्थित पाठामारी नाकाबाट भारतको विहार राज्यस्थित किशनगञ्ज जिल्ला अन्तरगतको ठाकुरगञ्ज रेल्वे स्टेशन लैजाने नेपाली युवतीलाई उद्धार गर्दै भुजेल र लिम्बुलाई पक्राउ गरिएको सशस्त्र प्रहरी बल सीमा सुरक्षा कार्यालय झापाका सशस्त्र प्रहरी उपरीक्षक रमेश सुवेदीले जानकारी दिए ।

मे ८ प ९९६ नम्बरको स्कुटरमा सवार युवतीसहित युवकद्धयलाई विशेष सुराकीको आधारमा सशस्त्र प्रहरीले विहीवार दिउँसो पक्राउ गरिएको उनले बताए । उद्धार गरिएका युवतीको साथबाट नेपाली नागरिकता फेला परेको छ ।

उनलाई भद्रपुर ४ निवासी दुर्गामाया गुरुङले ती युवकद्धयको प्रयोग गरी भारतको दिल्ली पठाउनलाई ठाकुरगञ्ज सम्म पुर्याउने जिम्मा दिएको अनुसन्धानको क्रममा खुलेको सशस्त्र प्रहरी उपरीक्षक सुवेदीले बताए । युवतीलाई दिल्लीबाट कुवेत पठाउने योजना बनाइएको थियो । उद्धार गरिएको युवती र ती युवकद्धयलाई आवश्यक अनुसंन्धानका लागि नेपाल प्रहरीलाई जिम्मा लगाइसकेको छ ।