काठमाडौं । राष्ट्रिय परीक्षा बोर्डले कक्षा १२ को मौका (ग्रेडवृद्धि) परीक्षाको नतिजा सार्वजनिक गरेको छ। बोर्डका अनुसार परीक्षामा सहभागी अधिकांश विद्यार्थी सफल भएका छन्।

बिहीबार प्रकाशित नतिजाअनुसार मौका परीक्षामा सहभागी ७१ हजार ३१० परीक्षार्थीमध्ये ५७ हजार ८९७ जनाले सबै विषयमा ग्रेड प्राप्त गरेका छन्। यो कुल सहभागीको ८१.१९ प्रतिशत हो।

यस वर्ष नियमित परीक्षामा न्यूनतम ग्रेड प्राप्त गर्न नसकेका विद्यार्थीलाई शैक्षिक अवसर उपलब्ध गराउने उद्देश्यले राष्ट्रिय परीक्षा बोर्डले साउन २ र ३ गते मौका परीक्षा सञ्चालन गरेको थियो। प्रकाशित नतिजाले ठूलो सङ्ख्यामा विद्यार्थीले आफ्नो शैक्षिक यात्रा अघि बढाउने अवसर पाएका छन्।

बोर्डका अनुसार परीक्षा सञ्चालनका क्रममा नियम उल्लङ्घन गरेको पाइएकाले तीन जना परीक्षार्थीको नतिजा रद्द गरिएको छ।

बोर्डले नतिजामा कुनै प्राविधिक त्रुटि देखिएमा परीक्षा नियन्त्रण कार्यालयमा रहेको मूल अभिलेखका आधारमा आवश्यक सच्याइने स्पष्ट पारेको छ।

विद्यार्थीहरूले आफ्नो नतिजा राष्ट्रिय परीक्षा बोर्डको वेबसाइट, एसएमएस तथा आइभीआर (IVR) सेवा मार्फत हेर्न सक्नेछन्।

मौका परीक्षाको नतिजासँगै नियमित परीक्षामा असफल भएका हजारौँ विद्यार्थीलाई अब उच्च शिक्षा अध्ययनका लागि नयाँ अवसर खुलेको बोर्डले जनाएको छ।

Originally published on abcnews.com.np.