काठमाडौं । लगातारको वर्षासँगै आएको पहिरो, बाढी र सडक कटानका कारण देशका विभिन्न जिल्लाका मुख्य सडक तथा राजमार्ग अवरुद्ध भएका छन्। नेपाल प्रहरीले शुक्रबार बिहान ५ बजेसम्मको विवरण सार्वजनिक गर्दै वर्षायामका कारण धेरै स्थानमा यातायात सेवा प्रभावित भएको जनाएको छ।

प्रहरीका अनुसार काभ्रेपलाञ्चोक–सिन्धुली जोड्ने बिपी राजमार्ग अन्तर्गत खुर्कोट–नेपालथोक–कटुन्जेबेँसी सडकखण्डमा बाढीको उच्च जोखिमका कारण बेलुका ६ बजेदेखि बिहान ४ बजेसम्म सबै प्रकारका सवारीसाधन सञ्चालनमा रोक लगाइएको छ। बिहान ४ बजेदेखि बेलुका ६ बजेसम्म भने सवारी सञ्चालन गर्न अनुमति दिइएको छ।

यस्तै, कान्ति लोकपथमा पनि वर्षायामभर बेलुका ५ बजेदेखि बिहान ५ बजेसम्म सवारी सञ्चालन बन्द गर्ने व्यवस्था कायम गरिएको छ।

इलामको मेची राजमार्गमा सडक हिलाम्मे भएपछि यातायात पूर्ण रूपमा अवरुद्ध भएको छ। त्यहाँ वैकल्पिक सडकमार्फत सवारी सञ्चालन भइरहेको प्रहरीले जनाएको छ।

सिन्धुपाल्चोकको जिरोकिलो, कोदारी र लिपिङ क्षेत्रमा पहिरो तथा सडक भासिँदा अरनिको राजमार्गका विभिन्न खण्ड पूर्ण रूपमा बन्द भएका छन्।

त्यसैगरी दोलखाको किर्नेटार क्षेत्रमा सामाकोशी खोलाले सडक कटान गरेपछि लामासाँघु–रामेछाप सडकखण्ड अवरुद्ध भएको छ। प्रभावित क्षेत्रमा वैकल्पिक मार्ग प्रयोग गर्न सकिने व्यवस्था मिलाइएको प्रहरीले जनाएको छ।

यसैबीच रसुवाको पासाङ ल्हामु सडक, मुगुको नाग्म–गमगढी सडक, बागलुङको कालीगण्डकी करिडोर, रुकुम पश्चिमको भेरी करिडोर तथा मुस्ताङको बेनी–जोमसोम सडक पनि पहिरोका कारण पूर्ण रूपमा बन्द रहेका छन्।

म्याग्दीमा सडक बगाउँदा बेनी–जोमसोम सडकखण्डका दुई स्थानमा यातायात अवरुद्ध भएको छ भने गुल्मीको मदन भण्डारी सडकखण्डमा सुक्खा पहिरो खसेपछि सवारी सञ्चालन रोकिएको प्रहरीले जनाएको छ।

नेपाल प्रहरीले वर्षायाममा पहिरो, बाढी, सडक कटान तथा गेग्रान बहावको जोखिम उच्च रहेकाले यात्रा गर्नुअघि सम्बन्धित सडकको पछिल्लो अवस्था बुझेर मात्रै यात्रा गर्न सर्वसाधारणलाई आग्रह गरेको छ। साथै आवश्यक परे वैकल्पिक मार्ग प्रयोग गर्न र सुरक्षाकर्मीको निर्देशन पालना गर्न पनि अनुरोध गरिएको छ।

Originally published on abcnews.com.np.