काठमाडौं । सिन्धुपाल्चोकको भोटेकोशी गाउँपालिका–३ स्थित तातोपानी भन्सार क्षेत्रमा सुख्खा पहिरो खस्दा सशस्त्र प्रहरी बलको बोर्डर आउट पोस्ट (बीओपी) मा भौतिक क्षति पुगेको छ।

गएराति करिब १ः१५ बजे बीओपीको उत्तर–पश्चिमतर्फ रहेको करिब २०० देखि ३०० मिटर अग्लो डाँडाबाट सुख्खा पहिरो खसेको सशस्त्र प्रहरीले जनाएको छ । पहिरोसँगै झरेका ठूला ढुङ्गा एकआपसमा ठोक्किएर उछिट्टिँदा ब्यारेकसहित विभिन्न संरचनामा क्षति पुगेको हो ।

सशस्त्र प्रहरीका अनुसार घटनामा कुनै मानवीय क्षति भएको छैन । तर, बीओपीका विभिन्न भौतिक संरचनामा उल्लेख्य क्षति पुगेको छ ।

पहिरोका कारण पहिलो लाइन ब्यारेकको एउटा झ्यालको सिसा फुटेको छ भने दोस्रो लाइन ब्यारेकको भित्तामा प्वाल परेको र जस्ताको छानामा छ वटा प्वाल परेको छ । त्यस्तै, एउटा ड्युटी पोस्ट पूर्ण रूपमा र अर्को आंशिक रूपमा क्षतिग्रस्त भएको छ ।

यसैगरी, राष्ट्रिय झण्डा राखिएको पोल पूर्ण रूपमा नष्ट भएको छ भने जिन्सी स्टोर भवनमा तीन वटा प्वाल परेका छन् । सिनियर अफिसरको बाथरुमको भित्तामा पनि क्षति पुगेको छ भने एउटा हिमाली ज्याकेटमा ढुङ्गा लागेर नोक्सानी भएको प्रहरीले जनाएको छ । मुख्य गेट अगाडिको सिँढीमा समेत पहिरोले क्षति पुर्याएको छ ।

घटनापछि सुरक्षा अवस्थाको मूल्याङ्कन तथा थप जोखिम न्यूनीकरणका लागि सम्बन्धित निकायले निगरानी बढाएको जनाएको छ ।

Originally published on abcnews.com.np.