काठमाडौं । नेपाल धितोपत्र बोर्ड (सेबोन)ले पुँजी बजारलाई स्थिर र परिपक्व बनाउन संस्थागत लगानीकर्ताको सहभागिता बढाउने तयारी गरेको छ।

बोर्डका अनुसार व्यक्तिगत तथा साना लगानीकर्ताको अत्यधिक सहभागिताले बजारमा अल्पकालीन कारोबार, हल्लाका आधारमा लगानी र मूल्यमा अस्वाभाविक उतारचढावको जोखिम बढाएको छ। त्यसैले संस्थागत लगानीकर्तालाई बजारको ‘स्टेबलाइजर’ का रूपमा विकास गर्ने योजना अघि सारिएको हो।

बोर्डले संस्थागत लगानीकर्ताको हिस्सा ४० देखि ५० प्रतिशतसम्म पुर्‍याउने मोडालिटीमा काम गरिरहेको जनाएको छ। म्युचुअल फन्ड, नागरिक लगानी कोष, कर्मचारी सञ्चय कोष, सामाजिक सुरक्षा कोष, बिमा कम्पनीलगायत संस्थालाई बजारमा थप सक्रिय बनाउने योजना छ।

सेबोनले बुक बिल्डिङ प्रणालीलाई पनि प्राथमिकता दिने भएको छ। यस प्रणालीमा योग्य संस्थागत लगानीकर्ताले पहिले सेयरको मूल्य निर्धारण गर्ने र त्यसपछि सर्वसाधारणका लागि सेयर निष्कासन गरिनेछ।

बोर्डका अध्यक्ष डा. गोपाल भट्टले संस्थागत लगानीकर्तालाई मूल्य निर्धारणमा बढी जिम्मेवार बनाएर बजारलाई स्थिर र व्यावसायिक बनाउनुपर्ने बताएका छन्।

यद्यपि, व्यक्तिगत लगानीकर्तालाई प्रत्यक्ष रूपमा बजारमा प्रवेश गर्न रोक्ने नभई उनीहरूलाई म्युचुअल फन्ड, एसआईपी तथा पोर्टफोलियो व्यवस्थापनजस्ता व्यावसायिक माध्यमबाट लगानी गर्न प्रोत्साहित गर्ने तयारी छ।

सेबोनले संस्थागत लगानी विस्तारका लागि कर्पोरेट ऋणपत्र बजार, निजी इक्विटी तथा भेञ्चर क्यापिटल, गैरआवासीय नेपालीको लगानी र स्टार्टअपका लागि वैकल्पिक पुँजी बजार विकासलाई समेत प्राथमिकतामा राखेको छ।

Originally published on abcnews.com.np.