काठमाडौं । पूर्वस्वास्थ्यमन्त्री प्रदीप पौडेलले सिंहदरबार वैद्यखानाको कारोबार चार गुणाले वृद्धि भएको भन्दै खुसी व्यक्त गरेका छन्। उनले १०५ बाट १५० प्रकारका औषधि उत्पादन गर्ने र ३५ प्रकारका निःशुल्क औषधिमा आत्मनिर्भर बन्ने प्रधानमन्त्रीको योजनाप्रति आभार व्यक्त गरेका हुन्।

आइतबार सामाजिक सञ्जालमार्फत पौडेलले आफू स्वास्थ्यमन्त्री हुँदा अघि सारेका नीति तथा योजनाकै आधारमा वैद्यखानाले गति लिएको दाबी गरेका छन्। नसर्ने रोग ३० प्रतिशतले घटाउने लक्ष्यसहित १० वर्षे राष्ट्रिय आयुर्वेद रणनीति तथा करिब ३७० वर्ष पुरानो वैद्यखानालाई पुनर्जीवन दिने उद्देश्यले पाँच वर्षे रणनीतिक योजना लागू गरिएको उनले स्मरण गरेका छन्। उनका अनुसार २० प्रकारका औषधिमा सीमित वैद्यखानालाई ६० प्रतिशत बजार हिस्सा र ‘गुड म्यानुफ्याक्चरिङ प्राक्टिस’ (GMP) मापदण्डमा पुर्‍याउने लक्ष्य राखिएको थियो।

पौडेलले सरकारले वैद्यखानाको पाँच वर्षे रणनीतिक योजना हुबहु कार्यान्वयन गर्नुपर्ने सुझाव दिएका छन्। उनले जडीबुटी प्रशोधन केन्द्रलाई ‘ड्रग रिसर्च एन्ड डेभलपमेन्ट’ युनिटसँग जोडेर अनुसन्धानमा लगानी बढाउन, ३५ निःशुल्क औषधिसहित थप औषधि देशभरका नागरिक आरोग्य केन्द्रमार्फत जनताको घरदैलोमा पुर्‍याउन आग्रह गरेका छन्।

त्यस्तै, GMP मापदण्ड हासिल गरेपछि नेपाली औषधि अन्तर्राष्ट्रिय बजारमा निर्यातका लागि कूटनीतिक पहल बढाउन, कच्चा पदार्थ खरिद व्यवस्थित गर्दै जडीबुटी खेतीलाई प्रोत्साहन गर्न तथा विपन्न नागरिकको पहुँच सुनिश्चित गर्न आयुर्वेदका विशिष्टीकृत सेवा र औषधिलाई स्वास्थ्य बीमामा आबद्ध गर्न उनले सुझाव दिएका छन्। पौडेलले आफ्नो कार्यकालमा भएका प्रमुख उपलब्धिहरूको विवरणसमेत सार्वजनिक गरेका छन्।

Originally published on abcnews.com.np.