काठमाडौं । नेपाली इलेक्ट्रिक सवारीसाधन बजारमा अर्को अत्याधुनिक एसयूभी थपिएको छ। नेपालका लागि लिपमोटरको आधिकारिक वितरक सांग्रिला मोटर्स प्रालिले शुक्रबार नयाँ लिपमोटर बी०३एक्स (Leapmotor B03X) सार्वजनिक गर्दै यसको औपचारिक बुकिङ खुला गरेको छ।

‘इन्टेलिजेन्ट अर्बन मोबिलिटी’ अवधारणामा आधारित यो नयाँ इलेक्ट्रिक एसयूभी आधुनिक प्रविधि, उच्च रेन्ज र नेपाली सडकलाई लक्षित डिजाइनका साथ बजारमा ल्याइएको कम्पनीले जनाएको छ।

५०५ किलोमिटर रेन्ज, शक्तिशाली मोटर

कम्पनीका अनुसार बी०३एक्समा १४५ किलोवाट क्षमताको विद्युतीय मोटर र ५३ किलोवाट–आवर (kWh) ब्याट्री जडान गरिएको छ। पूर्ण चार्जमा यसले सीएलटीसी (CLTC) मापदण्डअनुसार ५०५ किलोमिटरसम्मको ड्राइभिङ रेन्ज दिने दाबी गरिएको छ।

नेपाली सडकको अवस्थालाई ध्यानमा राखेर डिजाइन गरिएको यस गाडीमा १९० मिलिमिटर ग्राउन्ड क्लियरेन्स राखिएको छ, जसले विभिन्न प्रकारका सडकमा सहज यात्रा गर्न सहयोग गर्ने कम्पनीको भनाइ छ।

बी०३एक्समा ५१० लिटर क्षमताको फराकिलो बुटस्पेस, विशाल केबिन र प्रिमियम इन्टेरियर उपलब्ध छ।

सुरक्षाका लागि यसमा ADAS (Advanced Driver Assistance System) Level-2 प्रविधि जडान गरिएको छ, जसले स्मार्ट तथा सुरक्षित ड्राइभिङ अनुभव प्रदान गर्ने कम्पनीको दाबी छ। गाडी पाँच फरक रंगमा उपलब्ध हुनेछ।

लिपमोटरलाई विश्वप्रसिद्ध अटोमोबाइल समूह स्टेलान्टिसको रणनीतिक साझेदारी प्राप्त छ। स्टेलान्टिसअन्तर्गत मासेराटी, जीप, प्युजोलगायत १४ अन्तर्राष्ट्रिय ब्रान्ड सञ्चालनमा छन्।

कम्पनीका अनुसार लिपमोटर हाल चीनको अग्रणी न्यु इनर्जी भेहिकल (NEV) स्टार्टअप ब्रान्डमध्ये एक हो।

विश्वभर हालसम्म १६ लाखभन्दा बढी सवारीसाधन बिक्री गरिसकेको लिपमोटरले जुलाई महिनामा मात्रै १ लाखभन्दा बढी गाडी बिक्री गरेको जनाएको छ।

कम्पनीका अनुसार लिपमोटरको बिक्री तथा सेवा सञ्जाल अहिले ४० भन्दा बढी देशमा फैलिएको छ, जहाँ १,७०० भन्दा बढी बिक्री तथा सेवा केन्द्रसञ्चालनमा छन्।

प्रारम्भिक मूल्य

सांग्रिला मोटर्सले पहिलो १०० ग्राहकका लागि लिपमोटर बी०३एक्सको विशेष प्रारम्भिक मूल्य रु. ४४ लाख ९९ हजार निर्धारण गरेको जनाएको छ।

नेपालमा इलेक्ट्रिक सवारीसाधनको माग तीव्र रूपमा बढिरहेका बेला मध्यम मूल्य, उच्च रेन्ज र अत्याधुनिक सुरक्षा प्रविधिसहित आएको बी०३एक्सले प्रतिस्पर्धी ईभी बजारमा नयाँ विकल्प थप्ने अपेक्षा गरिएको छ।

Originally published on abcnews.com.np.