काठमाडौं । इंग्लिस अलराउन्डर सेफ अली जैब नेपाल प्रिमियर लिग (एनपीएल)को तेस्रो सिजन खेल्न सुदूरपश्चिम रोयल्स टोलीसँग जोडिएका छन् । टोलीले उनलाई पहिलो विदेशी खेलाडीका रूपमा भित्र्याएको हो।

जैब यसअघि एनपीएलको पहिलो सिजनमा सुदूरपश्चिम रोयल्सबाट खेलेका थिए, जहाँ उनी प्रतियोगिताकै उत्कृष्ट खेलाडी घोषित भएका थिए । नौ खेलमा दुई अर्धशतकसहित २७५ रन बनाएका उनले १२ विकेट पनि लिएका थिए। दोस्रो सिजनमा भने उनी चितवन राइनोज टोलीसँग आवद्ध भएका थिए र सातवटा खेलमा ११६ रन बनाएर पाँच विकेट हात पारेका हुन् ।

टी–२० करियर

जैबले हालसम्म ११२ वटा टी–२० खेल खेलेका छन्, जसमा उनले एक हजार ७९२ रन बनाएका छन् र २३ विकेट लिएका छन्। उनी भाइटालिटी ब्लास्ट र द हन्ड्रेडजस्ता प्रतियोगितामा पनि सहभागी भएका थिए । “आफ्नो घरमा फर्कन पाउँदा निकै खुसी लागेको छ र फेरि नेपाल आएर खेल्न निकै उत्साहित छु,” जैबले बताए।

सुदूरपश्चिम रोयल्सका सीईओ प्रकाश खड्काले जैबको पुनरागमनले टोलीलाई थप बलियो बनाउने विश्वास व्यक्त गरेका छन् । “जैबलाई फेरि टोलीमा स्वागत गर्न पाउँदा हामी निकै खुसी र उत्साहित छौँ । नेपाली कन्डिसनमा म्याच विनरका रूपमा आफूलाई प्रमाणित गरिसकेका जैबबाट यसपटक पनि पहिलो संस्करणकै जस्तो योगदानको अपेक्षा गरेका छौँ,” खड्काले भने।

अन्य खेलाडी

सुदूरपश्चिम रोयल्सले कप्तान दीपेन्द्रसिंह ऐरी, विनोद भण्डारी, आरिफ शेख, इशान पाण्डे, अभिनाश बोहरा, हेमन्त धामी र हिक्मत महरालाई रिटेन गरेको छ । यस्तै, टोलीले अक्सनमार्फत दीपक बोहरा, मिलन बोहरा, टेक रावत, अनिल खरेल, सचिन भट्ट र आयुब चन्दलाई भित्र्याएको छ।

Originally published on abcnews.com.np.