काठमाडौं । विश्व फुटबलका महान् खेलाडी तथा आठ पटकका बलोन डी’ओर विजेता लियोनल मेस्सीका पिता जर्ज मेस्सीको ६८ वर्षको उमेरमा निधन भएको छ। अर्जेन्टिनी फुटबल क्लब न्यूवेल्स ओल्ड ब्वाईजले शनिबार उनको निधनको पुष्टि गरेको हो।

अर्जेन्टिनी सञ्चारमाध्यमका अनुसार जर्ज मेस्सीको शुक्रबार रोसारियोस्थित एक अस्पतालमा उपचारका क्रममा निधन भएको हो।

लियोनल मेस्सीको बाल्यकालको क्लब न्यूवेल्स ओल्ड ब्वाईजले सामाजिक सञ्जालमार्फत श्रद्धाञ्जली व्यक्त गर्दै जर्ज मेस्सीको भूमिका केवल अभिभावकको मात्र नभई सफल खेल जीवनका आधारस्तम्भका रूपमा रहेको उल्लेख गरेको छ।

क्लबले आफ्नो सन्देशमा भनेको छ, “उहाँको निरन्तर साथ, विश्वास र पर्दापछाडिको नेतृत्वले लियोनल मेस्सीको हरेक यात्रामा महत्वपूर्ण भूमिका खेलेको थियो।”

मेस्सीको करियर निर्माणमा निर्णायक भूमिका

पूर्व धातु कारखानामा काम गर्ने जर्ज मेस्सीले आफ्ना छोरा लियोनलको फुटबल प्रतिभा पहिचान गरी सुरुदेखि नै प्रशिक्षण र व्यवस्थापनमा महत्वपूर्ण भूमिका खेलेका थिए।

सन् २००० मा १३ वर्षीय मेस्सीलाई उपचार र फुटबल करियरका लागि स्पेनको बार्सिलोना लैजान उनले अर्जेन्टिनामा रहेको आफ्नो स्थायी जागिर, परिवार र अन्य तीन सन्तानलाई केही समयका लागि छाडेर छोरासँगै स्पेन गएका थिए।

त्यसपछि उनी मेस्सीका अभिभावक मात्र नभई व्यक्तिगत एजेन्टका रूपमा पनि सक्रिय रहे। बार्सिलोना, पेरिस सेन्ट–जर्मेन (पीएसजी) हुँदै इन्टर मियामीसम्मको करियरमा जर्ज मेस्सीले व्यवस्थापकीय भूमिका निर्वाह गरेका थिए।

हालै सम्पन्न विश्वकपका क्रममा जर्ज मेस्सीको स्वास्थ्य अवस्थाबारे विभिन्न अफवाहहरू सार्वजनिक भएपछि मेस्सी परिवारले सञ्चारमाध्यमलाई जिम्मेवार बन्न र परिवारको गोपनीयताको सम्मान गर्न आग्रह गरेको थियो।

स्पेनिस फुटबल महासंघ (आरएफईएफ) ले पनि जर्ज मेस्सीको निधनप्रति गहिरो दुःख व्यक्त गर्दै लियोनल मेस्सी र सम्पूर्ण परिवारप्रति समवेदना प्रकट गरेको छ।

महासंघले जारी गरेको वक्तव्यमा भनिएको छ, “स्पेनिस फुटबल परिवारको तर्फबाट हामी लियोनल मेस्सी र उहाँका सम्पूर्ण परिवारप्रति यस दुःखद घडीमा हार्दिक समवेदना व्यक्त गर्दछौं।”

निजी जीवन रुचाउने व्यक्तित्व

जर्ज मेस्सी सार्वजनिक जीवनबाट टाढै रहने स्वभावका व्यक्ति मानिन्थे। उनी विरलै अन्तर्वार्तामा देखिन्थे। तर जब पनि उनले आफ्ना छोरा लियोनल मेस्सीबारे बोले, उनी सधैं गर्व र भावुकतासहित प्रस्तुत हुने गर्थे।

विश्व फुटबलका सर्वकालीन महान् खेलाडीमध्ये एक लियोनल मेस्सीको सफल यात्रामा जर्ज मेस्सीको त्याग, विश्वास र मार्गदर्शनलाई फुटबल जगत्ले सदैव स्मरण गर्ने विश्वास व्यक्त गरिएको छ।

Originally published on abcnews.com.np.