एजेन्सी । क्रिस्टियानो रोनाल्डोको जीवन अभावबाट विश्वकै सफल खेलाडी र व्यवसायी बन्नेसम्मको प्रेरणादायी यात्रा हो। पोर्चुगलको मडेइरामा सामान्य परिवारमा जन्मिएका रोनाल्डोले बाल्यकालमा आर्थिक अभाव र पारिवारिक समस्याको सामना गरे। १५ वर्षको उमेरमा मुटुको गम्भीर समस्या देखिए पनि उपचारपछि उनी मैदानमा फर्किए।

१२ वर्षको उमेरमा स्पोर्टिङ सीपीको एकेडेमी पुगेका रोनाल्डोले त्यसपछि म्यानचेस्टर युनाइटेड, रियल म्याड्रिड, युभेन्टस हुँदै पुनः म्यानचेस्टर युनाइटेड र अहिले साउदी क्लब अल–नासरसम्मको यात्रा तय गरेका छन्।

फुटबलबाट विश्वकै सर्वाधिक कमाउने खेलाडीमध्ये एक बनेका रोनाल्डोको सम्पत्ति अहिले फुटबलमा मात्र सीमित छैन। होटल, प्रविधि, एआई, मिडिया, स्वास्थ्य, फिटनेस, रेस्टुरेन्ट, रियल इस्टेट तथा खेलकुद व्यवसायमा उनले ठूलो लगानी गरेका छन्।

उनको सामाजिक सञ्जालको प्रभावसमेत विश्वकै ठूलोमध्ये एक छ। विभिन्न ब्रान्डको विज्ञापन र व्यावसायिक साझेदारीबाट उनले ठूलो आम्दानी गर्दै आएका छन्।

मैदानमा पाँच पटक ब्यालोन डी’ओर र पाँच पटक च्याम्पियन्स लिग जितेका रोनाल्डो करिअरमा १ हजार गोलको लक्ष्यतर्फ अघि बढिरहेका छन्।

अभावमा हुर्किएको मडेइराको बालक आज अर्बौँ डलरको सम्पत्ति, निजी जेट, विलासी कार र विश्वव्यापी व्यापारिक साम्राज्यका मालिक बनेका छन्। उनको कथा केवल फुटबल सफलताको कथा होइन, अवसर, मेहनत र व्यावसायिक सोचले जीवन कसरी बदल्न सक्छ भन्ने उदाहरणसमेत हो।

Originally published on abcnews.com.np.