काठमाडौं  — नेपाल क्रिकेट संघ (क्यान)ले नेपाल प्रिमियर लिग (एनपीएल) को तेस्रो संस्करण आगामी कात्तिक ९ गतेदेखि मंसिर ५ गतेसम्म सञ्चालन हुने घोषणा गरेको छ। प्रतियोगिता अंग्रेजी पात्रोअनुसार अक्टोबर २६ देखि नोभेम्बर २१, २०२६ सम्म आयोजना हुनेछ।

क्यानका अनुसार तेस्रो संस्करणको तयारी तीव्र पारिएको छ। प्रतियोगिताका लागि खेलाडी अक्सन सम्पन्न भइसकेको छ भने सहभागी आठवटै फ्रेन्चाइज टोलीले विदेशी खेलाडी अनुबन्ध गर्ने प्रक्रिया अघि बढाएका छन्।

एनपीएलले छोटो अवधिमै नेपाली क्रिकेटमा व्यावसायिक फ्रेन्चाइज प्रतियोगिताका रूपमा आफ्नो पहिचान स्थापित गरेको छ। पहिलो संस्करणको उपाधि जनकपुर बोल्ट्स ले जितेको थियो भने दोस्रो संस्करणमा लुम्बिनी लायन्स च्याम्पियन बनेको थियो।

यसपटक पनि घरेलु तथा विदेशी खेलाडीको मिश्रणसहित प्रतिस्पर्धात्मक प्रतियोगिता हुने अपेक्षा गरिएको छ। विदेशी स्टार खेलाडीको आगमनले प्रतियोगिताको स्तर र आकर्षण थप बढ्ने विश्वास क्यानको छ।

एनपीएललाई नेपाली क्रिकेट प्रतिभाको विकास, युवा खेलाडीलाई अन्तर्राष्ट्रिय स्तरका खेलाडीसँग प्रतिस्पर्धा गर्ने अवसर प्रदान गर्ने तथा नेपाली क्रिकेटको व्यावसायिक विस्तारको महत्वपूर्ण मञ्चका रूपमा हेरिएको छ। प्रतियोगिताको विस्तृत खेल तालिका, खेलस्थल तथा अन्य प्राविधिक विवरण क्यानले आगामी दिनमा सार्वजनिक गर्ने जनाएको छ।

Originally published on abcnews.com.np.