बागलुङ । बागलुङमा सम्पन्न दोस्रो अन्तरमाध्यमिक विद्यालयस्तरीय बास्केटबल प्रतियोगिताको उपाधि प्रकाश माध्यमिक विद्यालय बेनीले जितेको छ।

संयुक्त चार युवा क्लब बागलुङको आयोजनामा न्यु ओयसीस एकेडेमीमा सञ्चालित प्रतियोगिताको फाइनलमा चिल्ड्रेन लाइफ इङ्लिस बोर्डिङ स्कुल बागलुङलाई पराजित गर्दै प्रकाश माविले उपाधि हात पारेको हो।

फाइनलमा प्रकाश माविले ४३ स्कोर गर्दा चिल्ड्रेन लाइफले १२ स्कोरमा चित्त बुझायो।

उपाधिसँगै प्रकाश माविले नगद २२ हजार २२२ रुपैयाँसहित ट्रफी, मेडल र प्रमाणपत्र प्राप्त गरेको छ। उपविजेता चिल्ड्रेन लाइफले नगद १२ हजार २१२ रुपैयाँसहित ट्रफी, मेडल र प्रमाणपत्र प्राप्त गरेको क्लबका सचिव विरोश क्षेत्रीले जानकारी दिए।

प्रतियोगिताभर उत्कृष्ट प्रदर्शन गर्ने चिल्ड्रेन लाइफका निशान कार्कीलाई उत्कृष्ट खेलाडीको पुरस्कार प्रदान गरिएको थियो। यस्तै, प्रतियोगितामा सर्वाधिक स्कोर गर्ने प्रकाश माविका राम गर्बुजालाई पनि पुरस्कृत गरिएको थियो।

विजेता, उपविजेता तथा विधागत पुरस्कार बागलुङ नगरपालिका–४ का वडाध्यक्ष कुमारविक्रम क्षेत्री, रोटरी क्लब अफ बागलुङका अध्यक्ष पुनमप्रसाद शर्मा, एनप्याब्सनका केन्द्रीय सदस्य एवं बागलुङ अध्यक्ष नेत्रलाल न्यौपाने, क्लबका पूर्वअध्यक्ष अभिषेक कटुवाललगायतले वितरण गरेका थिए।

क्लबका अध्यक्ष साकार अधिकारीको अध्यक्षता तथा सचिव विरोश क्षेत्रीको सञ्चालनमा प्रतियोगिता सम्पन्न भएको हो।

प्रतियोगितामा बागलुङ र म्याग्दीका विभिन्न विद्यालयका गरी १२ टोली सहभागी थिए।

Originally published on abcnews.com.np.