नेपालगन्ज । नेपालगन्जमा खाना पकाउने ग्यास लुकाएर राखेको पाइएपछि एक किराना पसललाई ५० हजार रुपैयाँ जरिवाना गरिएको छ।

बाँकेका सहायक प्रमुख जिल्ला अधिकारी महेशकुमार गुरुङको नेतृत्वमा खटिएको बजार अनुगमन टोलीले नेपालगन्ज–११ स्थित शङ्कर दयाल बद्रीप्रसाद प्रोभिजन स्टोरमा ग्यास लुकाएर राखेको फेला पारेपछि कारबाही गरेको हो।

ग्यास लुकाएर राखिएको सूचना पाएपछि अनुगमन टोली पसलमा पुगेको थियो। निरीक्षणका क्रममा सूचना सही पुष्टि भएको सहायक प्रमुख जिल्ला अधिकारी गुरुङले बताए। उनका अनुसार उपभोक्ता संरक्षण ऐन, २०७५ बमोजिम पसललाई ५० हजार रुपैयाँ जरिवाना गरिएको हो।

अनुगमनका क्रममा पसलमा अखाद्य सामग्रीसमेत फेला परेको प्रशासनले जनाएको छ। फेला परेका त्यस्ता सामग्री नियन्त्रणमा लिइएको र आवश्यक कारबाही प्रक्रिया अघि बढाइने बताइएको छ।

पछिल्लो समय नेपालगन्जलगायतका क्षेत्रमा खाना पकाउने ग्यासको आपूर्ति घटेको गुनासो बढ्दै गएको छ। ग्यास अभावको आशंकामा कतिपय व्यवसायीले सिलिन्डर लुकाएर राख्ने तथा उपभोक्ताले समेत आवश्यकता भन्दा बढी ग्यास सञ्चय गर्ने क्रम बढ्न सक्ने भन्दै प्रशासनले बजार अनुगमनलाई तीव्रता दिएको हो।

सहायक प्रमुख जिल्ला अधिकारी गुरुङले बजारमा रहेका अन्य पसल तथा व्यवसायीको समेत निगरानी भइरहेको बताए। “उपभोक्ता संरक्षण ऐन उल्लंघन गरेको पाइएपछि कारबाही गरिएको हो। बजारका अन्य पसलहरूको पनि नियमित अनुगमन भइरहेको छ,” उनले भने।

स्थानीय प्रशासनले उपभोक्तालाई गुणस्तरीय वस्तु उपलब्ध गराउने, कृत्रिम अभाव तथा कालोबजारी नियन्त्रण गर्ने र स्वस्थ बजार प्रतिस्पर्धा कायम राख्ने उद्देश्यले अनुगमनलाई निरन्तरता दिने जनाएको छ।

Originally published on abcnews.com.np.