काठमाडौं । नेपालको पहिलो कमेडी एक्टमा आधारित रियालिटी शो **‘सुपर कमेडी लिग’**को औपचारिक घोषणा गरिएको छ। ओपन डोर्स इन्टरटेन्मेन्टले निर्माण गर्ने शो हास्य–व्यंग्यमा आधारित हुनेछ।

शोमा अभिनेता राजेश हमालले लिग प्रेसिडेन्टको भूमिका निर्वाह गर्नेछन्। त्यस्तै कलाकार विल्सन विक्रम राई, लुनिभा तुलाधर, रविन्द्र झा र सुरक्षा पन्त क्याप्टेन तथा मेन्टरका रूपमा रहने भएका छन्।

कार्यक्रमका लागि देशका पाँच सहरमा अडिसन सञ्चालन गरिनेछ। अडिसनबाट छनोट भएका ३२ जना प्रतिस्पर्धीलाई चार समूहमा विभाजन गरिनेछ। प्रत्येक समूहमा आठ जना प्रतिस्पर्धी रहनेछन् भने चार समूहको नेतृत्व चार क्याप्टेनले गर्नेछन्।

‘सुपर कमेडी लिग’ समूहगत प्रतिस्पर्धामा आधारित हुनेछ। कार्यक्रममा कम्तीमा दुई जना प्रतिस्पर्धीले एउटै स्क्रिप्टमा संयुक्त रूपमा प्रस्तुति दिनेछन्। आवश्यकताअनुसार प्रस्तुतिमा सहभागीको संख्या बढाउन सकिने आयोजकले जनाएको छ।

पूर्वनिर्धारित विषय र थिममा आधारित प्रस्तुतिमा स्केच, स्किट तथा ड्रामेडीलगायतका शैली समेटिनेछन्। आयोजकका अनुसार समूहमा मिलेर सिर्जनात्मक तथा हास्यपूर्ण प्रस्तुति दिनु कार्यक्रमको मुख्य विशेषता हुनेछ।

कार्यक्रमको नियमित प्रसारण भदौको अन्तिम सातादेखि सुरु हुने आयोजकले जनाएको छ।

Originally published on abcnews.com.np.