ललितपुर । अभिनेता राजेश हमालले कलाकारिताका विभिन्न विधामध्ये हास्य विधा अर्थात् कमेडी सबैभन्दा चुनौतीपूर्ण रहेको बताएका छन्।

ललितपुरमा आइतबार आयोजित नेपालको पहिलो ‘कमेडी एक्ट’मा आधारित रियालिटी शो **‘सुपर कमेडी लिग’**को औपचारिक घोषणा कार्यक्रममा बोल्दै हमालले मानिसलाई हँसाउनु निकै कठिन कार्य भएको बताए। उनले हास्य विधालाई जटिल र चुनौतीपूर्ण कलाका रूपमा व्याख्या गरे।

हास्य कलाकारको प्रशंसा

कार्यक्रममा अभिनेता हमालले हास्य कलाकार रविन्द्र झाको प्रसंग उल्लेख गर्दै उनको प्रस्तुति शैली र शिल्पको प्रशंसा गरे।

आफू ‘सुपर कमेडी लिग’को हिस्सा बन्न पाएकोमा खुशी व्यक्त गर्दै उनले यो कार्यक्रमले नेपाली मनोरञ्जन क्षेत्रमा नयाँ आयाम थप्ने विश्वास व्यक्त गरे।

“भावनामा आएर कसैलाई रुवाउन वा माया–प्रेमका कुरा प्रस्तुत गर्न सहज होला, तर प्रस्तुतिमार्फत कसैलाई हँसाउनु निकै चुनौतीपूर्ण हुन्छ,” हमालले भने।

रविन्द्र झाका लागि ‘स्कूल’

अभिनेता रविन्द्र झाले ‘सुपर कमेडी लिग’ आफ्नो लागि महत्वपूर्ण सिकाइको केन्द्र हुने बताए।

कार्यक्रममा आफूले पाएको जिम्मेवारीभन्दा अनुभव र ज्ञानलाई बढी प्राथमिकता दिने उल्लेख गर्दै उनले नयाँ तथा पुराना कलाकारबीच सहकार्यका लागि यो कार्यक्रम महत्वपूर्ण हुने बताए।

“यो शो मेरो लागि एउटा स्कूल हो, जहाँ राजेश दाइ प्रधानाध्यापक हुनुहुन्छ,” झाले भने।

लुकेका प्रतिभाका लागि मञ्च

अभिनेत्री सुरक्षा पन्तले ‘सुपर कमेडी लिग’मा टिम क्याप्टेनका रूपमा आफ्नो भूमिका रहने जानकारी दिइन्।

कार्यक्रमको अवधारणाले आफूलाई आकर्षित गरेको बताउँदै पन्तले पारिवारिक तथा सौहार्दपूर्ण वातावरणमा हेर्न सकिने हास्य–व्यङ्ग्यात्मक कार्यक्रमले नेपाली समाजमा छुट्टै पहिचान बनाउन सक्ने विश्वास व्यक्त गरिन्।

उनले शो ओझेलमा परेका तथा अवसरको खोजीमा रहेका प्रतिभाहरूका लागि उत्कृष्ट मञ्च बन्ने बताइन्।

क्याप्टेनको जिम्मेवारी नेतृत्वको अवसर

पन्तले टिम क्याप्टेनको जिम्मेवारीलाई आफूले व्यक्तिगत चुनौतीका रूपमा लिएको बताइन्।

कुनै पनि टोलीलाई निश्चित दृष्टिकोणसहित अघि बढाउँदै उत्कृष्ट प्रदर्शन गराउनु आफ्ना लागि नेतृत्व कौशल सिक्ने अवसरसमेत हुने उनको भनाइ थियो।

“हाम्रो समाजमा धेरै प्रतिभाशाली व्यक्तिहरू हुनुहुन्छ, जसले उचित प्लेटफर्मको अभावमा आफ्नो कला लुकाएर बस्नुभएको छ,” पन्तले भनिन्, “त्यस्ता प्रतिभाहरूलाई मञ्च प्रदान गर्नु नै यो लिगको सफलता हुनेछ।”

Originally published on abcnews.com.np.