काठमाडौं । प्रधानमन्त्री वालेन्द्र शाहले नेपालका लागि भारतीय राजदूत नवीन श्रीवास्तवसँग सोमबार सिंहदरबारस्थित प्रधानमन्त्री तथा मन्त्रिपरिषद्को कार्यालयमा भेटवार्ता गरेका छन्।

प्रधानमन्त्रीको सचिवालयका अनुसार शिष्टाचार भेटका क्रममा नेपाल–भारत सम्बन्ध, आपसी हित तथा दुई देशबीच सहकार्यका सम्भावित क्षेत्रबारे छलफल भएको थियो।

प्रधानमन्त्री शाहले विदेशी राजदूतसँग एक्लाएक्लै गरेको यो पहिलो भेटवार्ता हो। यसअघि प्रधानमन्त्री नियुक्त भएपछि उनले नेपालमा रहेका विभिन्न देशका राजदूत तथा कूटनीतिक नियोगका प्रमुखहरूसँग सामूहिक रूपमा भेटवार्ता गरेका थिए।

भेटमा नेपाल र भारतबीच लामो समयदेखि रहँदै आएको सम्बन्धलाई अझ सुदृढ बनाउने विषयमा छलफल भएको जनाइएको छ।

दुई देशबीच आपसी हितका विषयमा सहकार्यलाई थप प्रभावकारी बनाउने तथा आगामी दिनमा सहयोगका नयाँ क्षेत्र पहिचान गर्ने विषयमा समेत प्रधानमन्त्री शाह र राजदूत श्रीवास्तवबीच कुराकानी भएको थियो।

नेपाल र भारतबीच राजनीतिक, आर्थिक, व्यापारिक, ऊर्जा, पूर्वाधार, पर्यटन तथा जनस्तरको सम्बन्ध रहँदै आएको छ। यस्तो अवस्थामा प्रधानमन्त्री र भारतीय राजदूतबीचको भेटलाई दुई देशबीचको आगामी सहकार्यका दृष्टिले महत्वपूर्ण रूपमा हेरिएको छ।

भारतीय राजदूत : सहयोग निरन्तर रहने प्रतिबद्धता

भेटपछि भारतीय राजदूत नवीन श्रीवास्तवले प्रधानमन्त्री शाहसँग भेटवार्ता भएको जानकारी दिँदै नेपाल सरकारसँगको सहयोगलाई निरन्तरता दिनेबताएका छन्।

उनले नेपाल–भारत सम्बन्धलाई थप नयाँ उचाइमा पुर्‍याउने इच्छा व्यक्त गरेका छन्।

प्रधानमन्त्री शाहले पदभार ग्रहण गरेपछि विदेशी कूटनीतिज्ञसँग गरेको यो पहिलो औपचारिक एकल भेट भएकाले यसलाई उनको सरकारको विदेश नीति र छिमेकी मुलुकसँगको सम्बन्धका दृष्टिले समेत चासोका साथ हेरिएको छ।

भारतपछि प्रधानमन्त्री शाहले अन्य विदेशी कूटनीतिक प्रतिनिधिसँग पनि भेटवार्ता गर्ने तयारी गरेको बताइएको छ।

Originally published on abcnews.com.np.