काठमाडौं । विनयराज पौडेल निर्देशित चलचित्र **‘अक्षरा’**को टिजर सार्वजनिक गरिएको छ। सोमबार सार्वजनिक टिजरमा धनाढ्य परिवारमा विवाह गरेकी एक युवतीले भोग्नुपरेको पारिवारिक पीडा र हिंसाको कथा प्रस्तुत गरिएको छ।

टिजरले युवकको पारिवारिक पृष्ठभूमि नबुझी छोरीको विवाह गराउँदा उत्पन्न हुन सक्ने समस्यालाई मुख्य विषय बनाएको छ। चलचित्रमा सुशील पोखरेलले बुबाको भूमिका निर्वाह गरेका छन् भने न्यान्सी खड्का छोरी र सुशील सिटौला उनका श्रीमान्को भूमिकामा छन्।

सुशील सिटौला रक्सीको लतमा परेका तथा श्रीमतीमाथि हिंसा गर्ने र आफ्नो पारिवारिक रवाफ देखाउने चरित्रमा प्रस्तुत भएका छन्। श्रीमान्बाट कुटाइ खाएपछि माइती पुगेकी छोरीले बुबासँग गरेको मार्मिक संवाद टिजरको मुख्य आकर्षण बनेको छ।

टिजरमा न्यान्सीको पात्रले प्रश्न गर्छिन्, ‘कतिन्जेल नारीले मात्रै आफ्नो घर–थर सार्नुपर्ने? अरूलाई खुसी पार्ने बहानामा सधैँ आफू हार्नुपर्ने? छोरी भनेको अरूको घर जाने मात्र होइन बा, माइतीको टेको पनि हो। के म टेको बन्न पाउँदिन र बा?’

क्षित बाबु प्रोडक्सन हाउसको ब्यानरमा निर्माण भएको चलचित्रकी प्रस्तुतकर्ता सोनी थापा ढुंगाना हुन्। उग्रसेन ढुंगाना र सुग्रसेन ढुंगानाको लगानी रहेको चलचित्रका कार्यकारी निर्माता सुरज थापाकाजी र सुमन ज्योति न्यौपाने हुन्।

चलचित्रको मूल कथा निर्माता उग्रसेन ढुंगानाले लेखेका हुन् भने पटकथा तथा संवाद अभिमन्यु निरवी र निर्देशक पौडेलले तयार पारेका छन्।

चलचित्रमा न्यान्सी खड्का, सुशील पोखरेल, सुशील सिटौलासहित अंशु महर्जन, पुष्कर राउत, रिस्ता अधिकारी, उत्तम केसी, गीता अधिकारी, वीरेन्द्र कुशवाह, सृजना अधिकारी, मोहन अधिकारी, सुमन ज्योति न्यौपाने (ल्याग्री दादा) र सृष्टि खड्काको अभिनय रहेको छ। बालकलाकारतर्फ रोनक खड्का र प्रीसा ढुंगानाको अभिनय छ।

‘अक्षरा’ आगामी भदौ २६ गतेदेखि देशभरका हलमा प्रदर्शनमा आउनेछ।

Originally published on abcnews.com.np.