काठमाडौं । राष्ट्रिय स्वतन्त्र पार्टी (रास्वपा) का सांसद बोधनारायण श्रेष्ठले सार्वजनिक यातायातका चालकको नियमित स्वास्थ्य परीक्षणको व्यवस्था गर्न सरकारको ध्यानाकर्षण गराएका छन्।

शनिबार साउन २३ गते प्रतिनिधिसभाको बैठकमा बोल्दै सांसद श्रेष्ठले चालकलाई हृदयघात हुँदा सवारीसाधनमा रहेका यात्रुको ज्यान जोखिममा पर्न सक्ने भन्दै यस्ता अप्रत्याशित घटना रोक्न तत्काल कदम चाल्नुपर्ने बताए।

उनले केही दिनअघि धादिङमा माइक्रोबस चलाइरहेका चालकलाई हृदयघात भएको घटना सुनाउँदै यस्तो अवस्थामा निम्तिन सक्ने जोखिमबारे संसद्मा ध्यानाकर्षण गराए।

“तपाईं कतै जाँदै गर्दा गाडीमा सवार हुनुहुन्छ, चालकलाई हार्ट अट्याक भयो। त्यस्तो अवस्था एकछिन परिकल्पना गर्नुस् त ! अस्ति साउन २३ गते धादिङमा यस्तै भयो,” उनले भने।

चालकलाई हृदयघात भएपछि माइक्रोबस रोकिएको र तत्काल सीपीआर दिइए पनि चालकलाई बचाउन नसकिएको उनले बताए। घटनाप्रति दुःख व्यक्त गर्दै उनले चालकप्रति श्रद्धाञ्जली अर्पण गरे।

धादिङको घटना प्रतिनिधिमूलक मात्रै भएको भन्दै श्रेष्ठले केही दिनअघि चितवनमा पनि यस्तै घटना भएको जानकारी दिए। यस्ता घटनाले सार्वजनिक यातायातमा चालकको स्वास्थ्य अवस्थालाई गम्भीर रूपमा लिनुपर्ने आवश्यकता देखाएको उनको भनाइ थियो।

६ महिनामा स्वास्थ्य परीक्षणको प्रस्ताव

सांसद श्रेष्ठले सुरक्षित यात्राका लागि सवारीसाधनको अवस्था राम्रो भएर मात्र नहुने भन्दै चालकको स्वास्थ्य पनि उत्तिकै महत्वपूर्ण हुने बताए।

उनले सार्वजनिक यातायातका चालकको प्रत्येक ६ महिनामा स्वास्थ्य परीक्षण गर्ने, त्यसको डिजिटल अभिलेख राख्ने र मनोसामाजिक परामर्श दिने व्यवस्था गर्न प्रस्ताव गरे।

“हरेक ६ महिनामा सार्वजनिक यातायातका चालकको स्वास्थ्य परीक्षण गर्नुपर्छ, डिजिटल अभिलेख राख्नुपर्छ, मनोसामाजिक परामर्श दिनुपर्छ,” उनले भने।

कुनै चालक बिरामी भएमा स्वास्थ्य परीक्षण गरी फिटनेस प्रमाणित भएपछि मात्रै पुनः चालकका रूपमा काम गर्न पाउने व्यवस्था गर्नुपर्ने उनको सुझाव छ। यसका लागि यातायात व्यवसायी र सरकारले संयुक्त रूपमा आवश्यक कदम चाल्नुपर्ने उनले बताए।

Originally published on abcnews.com.np.