काठमाडौँ । नेपाली कांग्रेसका नेता प्रकाशमान सिंहले पार्टीको आगामी १५औँ महाधिवेशनलाई ‘एकताको महाधिवेशन’ का रूपमा सम्पन्न गर्नुपर्ने प्रस्ताव अघि सारेका छन्।

सोमबार काठमाडौँमा नेपाली कांग्रेस सिन्धुपाल्चोक–काठमाडौँ सम्पर्क समितिले आयोजना गरेको कार्यक्रममा बोल्दै नेता सिंहले पार्टीभित्र देखिएको विशेष महाधिवेशन र नियमित महाधिवेशन पक्षधरबीच समन्वय र सहकार्य आवश्यक रहेको बताएका हुन्।

सिंहले पार्टीलाई भावनात्मक तथा सांगठनिक रूपमा एकताबद्ध बनाउन १४औँ महाधिवेशनबाट निर्वाचित केन्द्रीय समिति र विशेष महाधिवेशनको माग गर्ने पक्षलाई उचित ढंगले समायोजन गरेर अघि बढ्नुपर्ने धारणा राखे।

उनले भने, ‘१५औँ महाधिवेशन अगाडि आइरहेको छ, त्यसलाई एकताको महाधिवेशन गरौँ भन्ने हाम्रो भनाइ हो। एकातिर विशेष महाधिवेशन पक्षधर हुनुहुन्छ भने अर्कोतिर हामी नियमित महाधिवेशन पक्षधर छौँ। नेपाली कांग्रेसलाई समग्र रूपमा मिलाउन दुवै पक्षलाई एकै ठाउँमा राखेर अघि बढ्नुपर्छ।’

नेता सिंहले महाधिवेशनलाई स्वच्छ र निष्पक्ष प्रतिस्पर्धाको थलो बनाउनुपर्नेमा पनि जोड दिए। उनले पार्टी नेतृत्वका लागि जो लोकप्रिय र सक्षम छ, उसैले नेतृत्व सम्हाल्ने वातावरण निर्माण गर्नुपर्ने बताए।

पार्टीको आन्तरिक विवाद समाधानका लागि नयाँ र अस्थायी विधि खोज्नुभन्दा कांग्रेसले अवलम्बन गर्दै आएको स्थापित विधि, प्रक्रिया र लोकतान्त्रिक अभ्यासअनुसार नै महाधिवेशन सम्पन्न गर्नुपर्ने उनको भनाइ थियो।

सिंहले कांग्रेसको आन्तरिक एकता मजबुत बनाउन पार्टीका सबै पक्ष जिम्मेवार बन्नुपर्ने बताए। उनले नेतृत्व चयनसँगै पार्टीको सांगठनिक एकता, कार्यकर्ताबीचको सम्बन्ध र आगामी राजनीतिक चुनौती सामना गर्न सक्ने कांग्रेस निर्माणलाई प्राथमिकता दिनुपर्ने धारणा राखे।

कांग्रेसभित्र नियमित महाधिवेशन र विशेष महाधिवेशनको विषयलाई लिएर देखिएको मतभेदका बीच सिंहको यस्तो प्रस्तावलाई पार्टीको आन्तरिक विवाद समाधानका लागि समन्वयकारी राजनीतिक पहलका रूपमा हेरिएको छ।

Originally published on abcnews.com.np.