काठमाडौं । लिनिङ १४औँ पुष्पलाल स्मृति राष्ट्रिय वरीयता ब्याडमिन्टन प्रतियोगिताको पहिलो दिन राष्ट्रिय नम्बर एक खेलाडी प्रिन्स दाहाल पराजित भएका छन्।

प्रतियोगिताको समूह ‘ए’ अन्तर्गतको लिग खेलमा एपीएफका दाहाललाई क्षितिज खनालले २–१ सेटले पराजित गर्दै अप्रत्याशित नतिजा निकालेका हुन्।

पहिलो सेट २१–१६ ले गुमाएका दाहालले दोस्रो सेटमा उत्कृष्ट पुनरागमन गर्दै २१–१३ ले जितेका थिए। निर्णायक तेस्रो सेटमा भने खनालले २१–१६ को जित निकाल्दै दाहाललाई पराजित गरे।

समूह ‘ए’ कै अर्को खेलमा नेपाल पुलिस क्लबका सुनिल जोशीले जीवन आचार्यलाई १६–२१, २१–१५, २१–१५ ले पराजित गर्दै विजयी सुरुवात गरे।

पुरुष एकलमा अन्य खेलाडीको जित

समूह ‘बी’ अन्तर्गत आर्मीका प्रफुल महर्जनले पुलिसका दीपक बोहरालाई २१–५, २१–१७ ले तथा पिस फिटनेस सेन्टरका विष्णु कटुवालले पुलिसका देवराज रानालाई २१–१७, २१–१९ ले पराजित गरे।

शीर्ष आठ वरीयताबाहेकको पुरुष एकलतर्फ कर्णालीका रमेश कामी, कस्तुरी कलेजका मिसेक छोङवाङ, आर्मीका सौर्य महर्जन र शिशिर राना, एपीएफका सुमित थोकर, आर्मीका विशाल तामाङ, पुलिसका टोपलाल कुमाल, मन्डला ब्याडमिन्टन एकेडेमीका अनन्त पाख्रिन, आर्मीका प्रतीक बिष्ट, पुलिसका जोन जसराज, बालकुमारी रिमिक्सका सम्यक शाक्य, एपीएफका सुजन थापा, विनय चौधरी र सुनसरीका नरेन्द्र लिम्बुले आ–आफ्ना प्रतिद्वन्द्वीलाई पराजित गर्दै राउन्ड अफ ३२ मा स्थान बनाए।

महिला एकलमा सुषमा, रसिला र रिहानाको जित

महिला एकलको समूह ‘ए’ मा नेपाल पुलिसकी सुषमा श्रेष्ठले आर्मीकी अनुमाया राईलाई २१–१६, २०–२२, २१–१६ ले हराइन्।

सोही समूहमा आर्मीकी रसिला महर्जनले पुलिसकी शेष्ना श्रीपालीलाई २१–८, २१–११ को सहज जित निकालिन्।

समूह ‘बी’ मा एपीएफकी रिहाना शेरचन र नेपाल पुलिसकी निता लम्सालले विजयी सुरुवात गरे। रिहानाले सेनाकी अमिता गिरीलाई २१–१३, २१–१२ले तथा निताले सिटिजेन बैंककी नंगशल तामाङलाई २१–१६, ११–२१, २१–१७ ले पराजित गरिन्।

४८२ खेलाडीको सहभागिता

नेपाल ब्याडमिन्टन संघसँग आबद्ध ६० जिल्ला तथा तीन विभागीय टोली—नेपाली सेना, नेपाल प्रहरी र सशस्त्र प्रहरी बल—का ४८२ खेलाडीप्रतियोगितामा सहभागी छन्।

साउन ३० गतेसम्म सञ्चालन हुने प्रतियोगितामा कुल १५ विधामा प्रतिस्पर्धा हुँदैछ।

प्रतियोगितामा शीर्ष आठ वरीयताका महिला तथा पुरुष एकल, शीर्ष आठ वरीयताबाहेकका महिला तथा पुरुष एकल, महिला तथा पुरुष खुला युगल, यू–११, यू–१५ र यू–१९ छात्र तथा छात्रा खुला एकल, ३५ वर्षमाथिको खुला युगल तथा ४५ र ५५ वर्षमाथिको मास्टर्स खुला युगल विधा समावेश छन्।

नेपाल खेलकुद महासंघको आयोजना तथा यल स्पोर्ट्स एकेडेमीको सहआयोजनामा प्रतियोगिता सञ्चालन भइरहेको हो। प्रतियोगिताको उद्घाटन नेकपा एमालेका संगठन प्रमुख एवं पूर्वमन्त्री भानुभक्त ढकालले गरेका थिए।

राष्ट्रिय नम्बर एक प्रिन्स दाहाल पहिलो दिनमै पराजित भएपछि प्रतियोगिताको पुरुष एकलतर्फको प्रतिस्पर्धा थप रोमाञ्चक बनेको छ। दाहालमाथि खनालको जित प्रतियोगिताको पहिलो दिनकै सबैभन्दा चर्चित नतिजामध्ये एक बनेको छ।

Originally published on abcnews.com.np.