काठमाडौं । संघीय संसद्अन्तर्गत प्रतिनिधिसभाको बैठक आज दिउँसो १ बजे सिंहदरबारमा बस्दैछ। बैठकमा खानी तथा खनिज पदार्थ विधेयक, २०८३ माथि विचार गरियोस् भन्ने प्रस्ताव पेस गर्ने कार्यसूची रहेको छ।

संघीय संसद् सचिवालयका अनुसार उद्योग, वाणिज्य तथा आपूर्तिमन्त्री गौरीकुमारी यादवले विधेयकमाथि विचार गरियोस् भन्ने प्रस्ताव प्रस्तुत गर्ने सम्भावना छ।

खानी तथा खनिज पदार्थको उत्खनन, व्यवस्थापन तथा उपयोगसँग सम्बन्धित कानुनी व्यवस्थालाई व्यवस्थित गर्ने उद्देश्यले विधेयक अघि बढाइएको हो।

दुई संसदीय समितिको बैठक पनि बस्दै

प्रतिनिधिसभाको बैठकसँगै आज दुईवटा संसदीय समितिको बैठक पनि बस्ने भएका छन्।

संघीय संसद् सचिवालयका अनुसार बिहान ११ बजे सार्वजनिक लेखा समितिको बैठक बस्नेछ। बैठकमा २०८२ भदौ २३ र २४ गते भएको आन्दोलन तथा त्यस क्रममा भएका घटनाका कारण जलेका स्रेस्ता तथा अभिलेखसम्बन्धी विषयमा छलफल गरिनेछ।

यसैगरी विकास, आर्थिक मामिला तथा सुशासन समितिको बैठक पनि आज बस्ने कार्यसूची रहेको छ। उक्त समितिको बैठकमा छलफल हुने विषय भने सचिवालयले सार्वजनिक गरेको छैन।

प्रतिनिधिसभाको आजको बैठकमा विधेयकमाथिको प्रारम्भिक छलफलसँगै समसामयिक संसदीय विषयमा समेत छलफल हुने अपेक्षा गरिएको छ।

Originally published on abcnews.com.np.