काठमाडौं । कपिलवस्तुमा सडक किनारमा बिग्रिएर मर्मत भइरहेको मिनिट्रकमा मोटरसाइकल ठोक्किँदा एक जनाको मृत्यु भएको छ भने दुई जना घाइते भएका छन्।

कपिलवस्तु नगरपालिका–७ धरमपनियाँ क्षेत्रमा सोमबार दुर्घटना भएको प्रहरीले जनाएको छ। सडक किनारमा मर्मत गरिरहेको ना.६ ख ६४२३ नम्बरको मिनिट्रकको पछाडि लु.८२ प ८६२८ नम्बरको मोटरसाइकल ठोक्किएको हो।

दुर्घटनामा मोटरसाइकल चालक शुद्धोधन गाउँपालिका–३ कटैयाभारीका २३ वर्षीय सन्तोष कहार गम्भीर घाइते भएका थिए। उनको जिल्ला अस्पताल तौलिहवामा उपचारका क्रममा सोमबार राति मृत्यु भएको प्रहरीले जनाएको छ।

मोटरसाइकलमा सवार कपिलवस्तु नगरपालिका–७ पिपरहवाका ३२ वर्षीय शेषराम पासी र सोही स्थानका २५ वर्षीय दुर्गेश यादव पनि घाइते भएका छन्। उनीहरूको रुपन्देहीको बुटवलस्थित चौराहा अस्पतालमा उपचार भइरहेको छ।

घाइते दुवैको अवस्था सामान्य रहेको बताइएको छ। दुर्घटनाबारे प्रहरीले थप अनुसन्धान गरिरहेको जनाएको छ।

Originally published on abcnews.com.np.