काठमाडौं । नेपाल ट्रक यातायात व्यवसायी महासंघ र सानिमा बैंक लिमिटेडबीच नागढुंगा–सिस्नेखोला सुरुङमार्ग प्रयोग गर्दा लाग्ने प्रवेश तथा उपभोग शुल्क नगदरहित प्रणालीबाट भुक्तानी गर्न सकिने व्यवस्था मिलाउने सम्बन्धमा सम्झौता भएको छ।

सम्झौतामा महासंघका तर्फबाट राजेन्द्र विक्रम बाँनिया र सानिमा बैंकका तर्फबाट प्रमुख निक्षेप अधिकृत हेमराज सञ्ज्यालले हस्ताक्षर गर्नुभएको छ।

सम्झौताअनुसार सुरुङमार्ग प्रवेश गर्दा लाग्ने शुल्क आरएफआईडी प्रणालीमार्फत व्यवस्थापन गरिनेछ। त्यस्तै, ट्रक तथा अन्य व्यवसायीले क्यूआर कोडमार्फत सहज रूपमा शुल्क भुक्तानी गर्न सक्ने व्यवस्था गरिनेछ।

नगदरहित प्रणाली लागू भएपछि सुरुङमार्ग प्रयोग गर्ने व्यवसायीले नगद बोकेर शुल्क तिर्नुपर्ने बाध्यता हट्नेछ। यसले भुक्तानी प्रक्रिया थप सहज, छरितो र पारदर्शी हुने अपेक्षा गरिएको छ।

सरकारले यसअघि नै सडक बोर्ड ऐन, २०५८ को दफा ६ को उपदफा (१) ले दिएको अधिकार प्रयोग गर्दै नागढुंगा–सिस्नेखोला सुरुङमार्गमा चल्ने सवारीसाधनबाट उपभोग शुल्क लिने निर्णय गरेको थियो। सोही निर्णयअनुसार सम्बन्धित मन्त्रालयले राजपत्रमा सूचना प्रकाशित गरी विभिन्न सवारीसाधनका लागि प्रवेश तथा बाहिरिने शुल्क निर्धारण गरेको हो।

कुन सवारीसाधनलाई कति शुल्क?

निर्धारित शुल्कअनुसार कार, भ्यान, पिकअप, ट्र्याक्टर, माइक्रोबस तथा अन्य हलुका सवारीसाधनले काठमाडौं प्रवेश गर्दा ६५ रुपैयाँ र बाहिरिँदा ६० रुपैयाँ तिर्नुपर्नेछ।

त्यस्तै, मिनी बस तथा मिनी टिपर/ट्रकले सुरुङमार्ग प्रवेश गर्दा ११५ रुपैयाँ र बाहिरिँदा ८० रुपैयाँ शुल्क तिर्नुपर्नेछ।

बस तथा सिंगल रियर एक्सल भएका ट्रकका लागि प्रवेश शुल्क २६० रुपैयाँ र बाहिरिने शुल्क २०० रुपैयाँ तोकिएको छ।

मल्टी एक्सल ट्रक, अन्य भारी सवारीसाधन तथा भारी उपकरणका लागि प्रवेश शुल्क ६०० रुपैयाँ र बाहिरिने शुल्क २५० रुपैयाँ निर्धारण गरिएको छ।

व्यवसायीलाई सहज हुने विश्वास

नगदरहित भुक्तानी प्रणाली लागू भएपछि विशेषगरी नियमित रूपमा सुरुङमार्ग प्रयोग गर्ने ट्रक तथा मालवाहक सवारीसाधन व्यवसायीलाई शुल्क भुक्तानीमा सहज हुने महासंघका अध्यक्ष राजेन्द्र विक्रम बाँनियाले बताउनुभयो।

आरएफआईडी तथा क्यूआर कोडमा आधारित भुक्तानी प्रणालीले शुल्क तिर्न लाग्ने समय घटाउनुका साथै कारोबारलाई व्यवस्थित र पारदर्शी बनाउन सहयोग पुग्ने अपेक्षा गरिएको छ।

Originally published on abcnews.com.np.