काठमाडौं । नेपाल सरकारले पोर्चुगललाई काठमाडौंमा काउन्सिलर कार्यालय खोल्न सहमति प्रदान गरेको छ। मंगलबार (साउन २६ गते) बसेको मन्त्रिपरिषद्को बैठकले पोर्चुगललाई काउन्सिलर कार्यालय खोल्न अनुमति दिने निर्णय गरेको हो।

मन्त्रिपरिषद्को निर्णय सार्वजनिक गर्दै भनिएको छ, “पोर्चुगल सरकारलाई काठमाडौंमा काउन्सिलर कार्यालय खोल्न सहमति दिने।”

पछिल्लो समय अध्ययन तथा वैदेशिक रोजगारीका लागि नेपालीहरूका लागि पोर्चुगल आकर्षक गन्तव्य बन्दै गएको छ। पोर्चुगलमा ७० हजारभन्दा बढी नेपाली रहेको अनुमान छ।

हाल नेपालमा पोर्चुगलको दूतावास छैन। त्यसकारण पोर्चुगल जान चाहने नेपालीले भिसालगायतका कन्सुलर सेवाका लागि भारतको नयाँ दिल्लीस्थित पोर्चुगलको दूतावासमा पुग्नुपर्ने बाध्यता रहँदै आएको छ। काठमाडौंमा काउन्सिलर कार्यालय स्थापना भएपछि नेपालीले कन्सुलर सेवा लिन भारत जानुपर्ने झन्झट कम हुने अपेक्षा गरिएको छ।

अप्रिलमै भएको थियो कार्यालय खोल्ने घोषणा

परराष्ट्रमन्त्री शिशिर खनालले मन्त्रालयको जिम्मेवारी सम्हालेपछि १ अप्रिल २०२६ मा पोर्चुगलका विदेशमन्त्री पाउलो रंगेलसँग टेलिफोन वार्ता गर्नुभएको थियो। उक्त वार्ताका क्रममा पोर्चुगलका विदेशमन्त्री रंगेलले काठमाडौंमा काउन्सिलर कार्यालय स्थापना गर्ने घोषणा गर्नुभएको थियो।

त्यसपछि २९ अप्रिलदेखि १ मे २०२६ सम्म नेपाल भ्रमणमा आउनुभएकी पोर्चुगलकी उपविदेशमन्त्री डा. आना इसाबेल जेभियरले काठमाडौंमा काउन्सिलर कार्यालय स्थापना गर्ने प्रक्रिया अघि बढाउनुभएको थियो।

उपविदेशमन्त्री जेभियरसँगको भेटमा परराष्ट्रमन्त्री खनालले काउन्सिलर कार्यालय स्थापना गर्न नेपाल सरकारका तर्फबाट पूर्ण सहयोग रहने प्रतिबद्धता व्यक्त गर्नुभएको थियो।

मन्त्रिपरिषद्को पछिल्लो निर्णयसँगै काठमाडौंमा पोर्चुगलको काउन्सिलर कार्यालय स्थापना गर्ने प्रक्रिया औपचारिक रूपमा अघि बढ्ने भएको छ।

Originally published on abcnews.com.np.