काठमाडौ। श्रम संस्कृति पार्टीका सांसद ध्रुवराज राईले राष्ट्रियताको विषयमा सबै राजनीतिक दल र नागरिक एकढिक्का हुनुपर्नेमा जोड दिएका छन्।

मंगलबार संघीय संसद भवन बाहिर सञ्चारकर्मीहरूसँग कुरा गर्दै उनले मुलुकको सार्वभौमसत्ता र राष्ट्रियता जस्तो संवेदनशील विषयमा विवाद गर्नुभन्दा पनि समाधान खोज्नुपर्ने बताएका हुन्।

सांसद राईले राष्ट्रियताको सवालमा आफ्नो पार्टी र नेतृत्वको स्पष्ट धारणा रहेको उल्लेख गरे।

पार्टी अध्यक्षले संसद्मा व्यक्त गरेको ‘कोर्रा’ सम्बन्धी अभिव्यक्तिको प्रष्टीकरण दिँदै सांसद राईले त्यसलाई भौतिक कारबाहीको रूपमा नभई कडा कानूनी शासनको अर्थमा बुझ्न आग्रह गरे।

उनले भने, ‘राष्ट्रियताको विषयमा हामी सबै नेपाली एकढिक्का हुन आवश्यक छ। यसमा विवाद गरिरहनु उचित हुँदैन, बरु शिघ्र समाधान खोजिनुपर्छ। अध्यक्षज्यूले भन्नुभएको कोर्राको अर्थ भौतिक रूपमा आक्रमण गर्ने भन्ने होइन, बरु अराजकता, साम्प्रदायिक र धार्मिक द्वन्द्व भड्काउनेहरूलाई कडा कानुनी दायरामा ल्याउनुपर्छ भन्ने हो।’

सामाजिक सञ्जालमा सार्वजनिक भएको आफ्नो एक भिडियोका सम्बन्धमा टिप्पणी गर्दै सांसद राईले त्यसलाई आफ्नो व्यक्तिगत र सांस्कृतिक परम्परासँग जोडेर बचाउ गरे।

Originally published on abcnews.com.np.