लिस्बन । पोर्चुगलमा पहिलोपटक आयोजना हुन लागेको युरोपस्तरीय नेपाली टी–१० क्रिकेट प्रतियोगितामा विजेताले ५ हजार ५५५ युरो पुरस्कार पाउने भएका छन् ।

गैरआवासीय नेपाली संघ (एनआरएनए) पोर्चुगलको आयोजनामा आगामी सेप्टेम्बर १४ देखि १६ सम्म हुने प्रतियोगितामा उपविजेताले पनि २ हजार ५५५ युरो प्राप्त गर्नेछ ।

आयोजकका अनुसार विजेताले पाउने ५ हजार ५५५ युरो नेपाली रुपैयाँमा करिब ९ लाख ६५ हजार बराबर हो । त्यस्तै उपविजेताले पाउने २ हजार ५५५ युरो करिब ४ लाख ४५ हजार रुपैयाँ बराबर हुनेछ ।

आयोजकले यो पुरस्कार राशि युरोपमा आयोजना हुँदै आएका नेपाली खेलकुद प्रतियोगितामध्ये अहिलेसम्मकै ठूलो भएको दाबी गरेको छ । प्रतियोगिताको पुरस्कारसँगै युरोपमा रहेका नेपाली क्रिकेट खेलाडीलाई आकर्षित गर्ने र प्रतिस्पर्धात्मक वातावरण निर्माण गर्ने लक्ष्य राखिएको छ ।

प्रतियोगिताको ब्रान्ड एम्बासडरमा नेपाली राष्ट्रिय क्रिकेट टोलीका खेलाडी विनोद भण्डारी रहेका छन् । प्रतियोगिताको प्रचारप्रसार तथा आवश्यक समन्वयका लागि भण्डारी लिस्बन पुगिसकेका छन् ।

नेपाली क्रिकेटमा लामो समय राष्ट्रिय टोलीबाट खेलेका भण्डारीको उपस्थितिले प्रतियोगिताको आकर्षण थप बढाउने आयोजकको अपेक्षा छ । उनको उपस्थितिलाई युरोपमा रहेका नेपाली क्रिकेट खेलाडी तथा क्रिकेटप्रेमीलाई प्रतियोगितासँग जोड्ने महत्त्वपूर्ण माध्यमका रूपमा हेरिएको छ ।

पोर्चुगलमा नेपाली समुदायको संख्या बढ्दै जाँदा नेपाली युवामाझ क्रिकेटको लोकप्रियता पनि बढिरहेको भन्दै एनआरएनए पोर्चुगलले युरोपमा रहेका नेपाली क्रिकेट प्रतिभालाई एउटै प्लेटफर्ममा ल्याउने उद्देश्यले प्रतियोगिता आयोजना गर्न लागेको जनाएको छ ।

प्रतियोगितामार्फत पोर्चुगलसहित युरोपका विभिन्न देशमा रहेका नेपाली क्रिकेट खेलाडीलाई आफ्नो क्षमता प्रदर्शन गर्ने अवसर उपलब्ध गराउने, नयाँ प्रतिभाको पहिचान गर्ने र नेपाली क्रिकेटको विकास तथा प्रवर्द्धनमा योगदान पुर्याउने आयोजकको लक्ष्य छ ।

आयोजकका अनुसार प्रतियोगिता क्रिकेटको प्रतिस्पर्धामा मात्र सीमित रहने छैन । युरोपमा रहेका नेपाली युवालाई खेलकुदमार्फत एकताबद्ध गर्दै आपसी भाइचारा, मित्रता र सहकार्य बढाउने तथा नेपाली समुदायमा सकारात्मक खेल संस्कृतिको विकास गर्ने उद्देश्य पनि प्रतियोगिताले बोकेको छ ।

प्रतियोगिताका लागि सहभागी टोली, खेल सञ्चालनको प्रारूप, खेल तालिका तथा व्यवस्थापनलगायतका तयारी तीव्र रूपमा अघि बढिरहेको आयोजकले जनाएको छ । प्रतियोगिताका खेल अन्तर्राष्ट्रिय मापदण्डअनुसार सञ्चालन गर्ने तयारी गरिएको छ ।

एनआरएनए पोर्चुगलका संयोजक विवेक श्रेष्ठले प्रतियोगितालाई सफल बनाउन नेपाली सञ्चारमाध्यम, खेलाडी, टोली, प्रायोजक तथा सम्पूर्ण नेपाली समुदायको सहयोग आवश्यक रहेको बताएका छन् ।

प्रतियोगिताका आयोजकले युरोपमा नेपाली क्रिकेटको विकासका लागि यो प्रतियोगिता महत्त्वपूर्ण सुरुआत हुने विश्वास व्यक्त गर्दै आगामी दिनमा यसको दायरा अझ विस्तार गर्ने लक्ष्य राखेको जनाएको छ ।

Originally published on abcnews.com.np.