काठमाडौं । नेपाली खेलाडी अनन्त तामाङ र एरिक विष्ट आबद्ध बंगलादेशी क्लब फोर्टिस एफसीले एएफसी च्यालेन्ज लिगको समूह चरणमा स्थान सुरक्षित गरेको छ।

बंगलादेशको ढाकास्थित बसुन्धरा किंग्स एरिनामा भएको छनोट खेलमा फोर्टिसले कीर्गिस्तानको मुरास युनाइटेडलाई १–० गोलले पराजित गर्दै समूह चरणमा स्थान पक्का गरेको हो।

फोर्टिसको जितमा विंगर मोहम्मद इब्राहिमले खेलको ५२औँ मिनेटमा निर्णायक गोल गरे।

नेपाली राष्ट्रिय टोलीका खेलाडी अनन्त तामाङ र एरिक विष्ट दुवै फोर्टिसको सुरुवाती ११ मा परेका थिए।

गत सिजन बंगलादेश प्रिमियर लिगमा तेस्रो स्थान हासिल गरेको फोर्टिसले एएफसी क्लब लाइसेन्सिङका आवश्यक मापदण्ड पूरा गरेपछि पहिलोपटक एएफसी प्रतियोगिता खेल्ने अवसर पाएको हो।

फोर्टिसले छनोट पार गरेसँगै नेपाली खेलाडी अनन्त र एरिकका लागि पनि एएफसी च्यालेन्ज लिगको समूह चरणमा खेल्ने अवसर सिर्जना भएको छ।

एएफसी च्यालेन्ज लिगको समूह चरणको ड्र अर्को साता हुने बताइएको छ।

Originally published on abcnews.com.np.