महेन्द्रनगर । महाकाली नदीमा पानीको बहाव एक लाख आठ हजार ६१ क्युसेक पुगेपछि पश्चिमी नाका भएर हुने सवारी आवागमन प्रभावित भएको छ।

मंगलबार बेलुकीदेखि महाकाली नदीको जलस्तर बढेपछि शारदा ब्यारेज (बनबासा पुल) मा चारपाङ्ग्रे ठूला सवारीसाधनको आवागमन रोकिएको हो। इलाका प्रहरी कार्यालय गड्डाचौकीका प्रमुख प्रहरी वरिष्ठ नायब निरीक्षक जीवन गुरुङका अनुसार बेलुकी ५ बजेपछि पुलमा ठूला सवारीसाधन सञ्चालनमा रोक लगाइएको थियो।

उनका अनुसार राति ९ बजे गरिएको मापनमा महाकाली नदीको बहाव एक लाख आठ हजार क्युसेक नाघेको थियो। पानीको बहाव निरन्तर बढ्दै गएपछि भारतीय पक्षले सुरक्षालाई ध्यानमा राख्दै शारदा ब्यारेजमा ठूला सवारीसाधनको आवागमन रोकेको हो।

ठूला सवारीसाधन सञ्चालनमा रोक लगाएपछि भारतका विभिन्न क्षेत्रमा जाने तथा भारतबाट नेपाल आउने सवारीसाधनको आवागमन प्रभावित भएको छ। साना सवारीसाधन भने सञ्चालनमा रहेको प्रहरीले जनाएको छ।

प्रहरीका अनुसार शारदा ब्यारेजको संरचना जीर्ण रहेकाले महाकाली नदीमा पानीको बहाव एक लाख क्युसेकभन्दा माथि पुगेपछि भारतीय पक्षले ठूला सवारीसाधनको आवागमन रोक्दै आएको छ। नदीमा पानीको बहाव घटेपछि आवागमन क्रमशः सहज हुने बताइएको छ।

सुदूरपश्चिमका पहाडी जिल्ला दार्चुला र बैतडी तथा भारतको धार्चुला क्षेत्रमा भएको वर्षाका कारण महाकाली नदीको जलस्तर बढेको बताइएको छ। लगातार वर्षा भइरहेकाले नदीको बहाव थप बढ्न सक्ने सम्भावना रहेकाले सीमावर्ती क्षेत्रमा सतर्कता अपनाउनुपर्ने देखिएको छ।

Originally published on abcnews.com.np.