काठमाडौं । जिम्बाब्वेको करिबा तालमा क्षमताभन्दा बढी यात्रु बोकेको डुंगा पल्टिँदा कम्तीमा १५ जनाको मृत्यु भएको छ । दुर्घटनामा २७ जना बेपत्ता छन् ।
राष्ट्रिय विपद् व्यवस्थापन एजेन्सीका अनुसार ७७ जनाको सकुशल उद्धार गरिएको छ ।
जिम्बाब्वेको सिभिल प्रोटेक्सन युनिटका अनुसार टिकट बिक्रीको विवरणमा डुंगामा ११४ जना वयस्क यात्रु र चालक दलका पाँच सदस्य सवार थिए । टिकट आवश्यक नपर्ने उमेर समूहका बालबालिकाको संख्या भने यकिन नभएकाले उनीहरू विवरणमा समावेश नभएको हुनसक्ने जनाइएको छ ।
एजेन्सीका अनुसार डुंगाको क्षमता ९० जनाको मात्र थियो । दुर्घटनापछि उद्धार तथा खोजी कार्य जारी राखिएको छ ।
दुर्घटनाको कारणबारे भने प्रहरीले विस्तृत विवरण सार्वजनिक गरेको छैन ।
Originally published on abcnews.com.np.
प्रतिक्रिया दिनुहोस्