काठमाडौं । अमेरिकी पूर्वराष्ट्रपति डोनाल्ड ट्रम्पको स्वामित्वमा रहेको ‘ट्रम्प मिडिया एन्ड टेक्नोलोजी ग्रुप’ (टीएमटीजी)ले सन् २०२६ को दोस्रो त्रैमासिकमा २३८.१ मिलियन डलर घाटा व्यहोरेको छ।

अप्रिलदेखि जुनसम्म कम्पनीको कुल आम्दानी १.७ मिलियन डलर मात्र रहेको छ। जनवरीदेखि जुनसम्म टीएमटीजीको खुद नोक्सानी करिब ६४४ मिलियन डलर पुगेको छ भने सो अवधिमा कम्पनीले २.५ मिलियन डलर मात्र आम्दानी गरेको छ।

डिजिटल सम्पत्तिमा गिरावट

कम्पनीको ठूलो घाटाको मुख्य कारण डिजिटल सम्पत्ति, डिजिटल सम्पत्ति धितोमा आधारित लगानी र इक्विटी सेक्युरिटिजको मूल्यमा आएको गिरावट रहेको जनाइएको छ। यी सम्पत्तिको मूल्य घट्दा टीएमटीजीले करिब १९०.४ मिलियन डलर नोक्सानी व्यहोरेको छ।

यस्तै, कम्पनीले ११.७ मिलियन डलर ब्याज खर्च र ८.१ मिलियन डलर सेयरमा आधारित भुक्तानी खर्च गरेको छ।

अप्रिलदेखि जुनसम्म कम्पनीले विज्ञापनबाट १.४३ मिलियन डलर आम्दानी गरेको थियो।

ट्रुथ सोसलका प्रयोगकर्ता घट्दै

टीएमटीजीको मुख्य प्लेटफर्म ‘ट्रुथ सोसल’ हो। कम्पनीले ‘ट्रुथप्लस’ भिडियो स्ट्रिमिङ र ‘ट्रुथडटफी’ लगायतका सेवा सञ्चालन गर्नुका साथै क्रिप्टोकरेन्सीसम्बन्धी कारोबारमा समेत विस्तार गरेको छ।

ट्रम्पले सन् २०२२ मा ट्रुथ सोसल सुरु गरेका थिए। तर, यो प्लेटफर्म एक्स र फेसबुकजस्ता ठूला सामाजिक सञ्जालको स्तरमा पुग्न सकेको छैन।

न्युयोर्क टाइम्सले सिमिलरवेबको तथ्यांक उद्धृत गर्दै जुलाई २०२६ मा ट्रुथ सोसलको वेबसाइटमा आउने आगन्तुकको संख्या अघिल्लो वर्षको तुलनामा एक तिहाइभन्दा बढी घटेको जनाएको छ।

सेयर मूल्यमा गिरावट

टीएमटीजीको सेयर अमेरिकी सेयर बजार न्यास्डाकमा ‘डीजेटी’ नामबाट कारोबार हुन्छ। कमजोर वित्तीय नतिजा सार्वजनिक भएपछि सोमबार कम्पनीको सेयर मूल्य करिब ८ प्रतिशतले घटेको थियो।

कम्पनीले अगस्ट १ देखि ‘ट्रुथ एपीआई’ सेवा सञ्चालनमा ल्याएको छ। यसमार्फत कम्पनीहरूले ट्रम्पले ट्रुथ सोसलमा पोस्ट गरेका सामग्री तत्काल प्राप्त गर्न सक्नेछन्।

कम्पनीका अन्तरिम प्रमुख कार्यकारी अधिकृत केभिन म्याकगर्नका अनुसार हालसम्म १० भन्दा बढी कम्पनीले यो सेवा लिएका छन्। सेवाका लागि कम्पनीहरूले प्रतिमहिना करिब ६० हजारदेखि एक लाख डलरसम्म शुल्क तिर्ने गरेका छन्।

ट्रम्पका सामाजिक सञ्जाल पोस्टले कहिलेकाहीँ सेयर बजारमा तत्काल प्रभाव पार्ने भएकाले कम्पनीहरूले उनका पोस्ट अरूभन्दा पहिले प्राप्त गर्न चाहेको बताइएको छ। ट्रम्पले कुनै देशमाथि नयाँ ट्यारिफ घोषणा गर्दा सम्बन्धित देश वा कम्पनीको सेयर मूल्यमा तत्काल प्रभाव पर्न सक्छ।

टीएमटीजीले अमेरिकी सेक्युरिटिज एन्ड एक्सचेन्ज कमिसन (एसईसी)मा बुझाएको प्रतिवेदनअनुसार, अघिल्लो वर्षको दोस्रो त्रैमासिकमा कम्पनीको घाटा करिब २० मिलियन डलर थियो। यो वर्ष सोही अवधिमा घाटा बढेर २३८.१ मिलियन डलर पुगेको छ।

अलजजिराको सहयोगमा

Originally published on abcnews.com.np.