रसुवा । जिल्ला प्रहरी कार्यालय रसुवाले भालुको खुट्टासहित दुई जनालाई पक्राउ गरेको छ। गोसाइँकुण्ड गाउँपालिका–६ धुन्चेस्थित पासाङ ल्हामु राजमार्गबाट उनीहरू पक्राउ परेका हुन्।

पक्राउ पर्नेमा आमाछोदिङ्मो गाउँपालिका–५ का २९ वर्षीय गोम्बो तामाङ र वडा नम्बर ३ का २४ वर्षीय तोप्देन तामाङ रहेका छन्। प्रहरीका अनुसार मंगलबार गत्लाङबाट त्रिशूलीतर्फ जाँदै गरेको प्रदेश ३–०१–००५ ख ९७८३ नम्बरको टिपर जाँच गर्ने क्रममा भालुको खुट्टा फेला परेको हो।

जिल्ला प्रहरी कार्यालय रसुवाका प्रहरी निरीक्षक डिल्लीराज सापकोटाका अनुसार टिपरको हाइड्रोलिक पाइपमुनि रातो डोरीले बाँधेर राखिएको अवस्थामा भालुको खुट्टा बरामद गरिएको थियो।

पक्राउ परेका दुवै जनालाई थप अनुसन्धान तथा आवश्यक कारबाहीका लागि लाङटाङ राष्ट्रिय निकुञ्जको धुन्चे कार्यालयमा बुझाइएको प्रहरीले जनाएको छ।

भालुको खुट्टा कहाँबाट र कसरी प्राप्त भयो भन्ने विषयमा अनुसन्धान भइरहेको छ। वन्यजन्तुको अवैध शिकार तथा ओसारपसारको सम्भावनासमेतलाई ध्यानमा राखेर निकुञ्जले घटनाबारे थप अनुसन्धान अघि बढाउने जनाएको छ।

Originally published on abcnews.com.np.