काठमाडौँ । प्रमुख प्रतिपक्षी नेपाली कांग्रेस संसदीय दलका नेता भीष्मराज आङ्देम्बेले जेनजी विद्रोह र निर्वाचनबाट प्राप्त जनादेशअनुसार बनेको बालेन सरकारले प्रतिबद्धता पूरा गर्न नसक्दा युवामा पुनः निराशा बढेको दाबी गरेका छन्।

अन्तर्राष्ट्रिय युवा दिवसका अवसरमा बुधबार शुभकामना सन्देश जारी गर्दै आङ्देम्बेले रोजगारी सिर्जना, सुशासन र विदेशिएका युवालाई स्वदेश फर्काउने विषयमा सरकार असफल भएको आरोप लगाए। देशमै स्वरोजगार भएका युवा गणेश नेपाली र विवेक मण्डलले गरेको आत्मदाहलाई उनले युवामा बढ्दो निराशाका ज्वलन्त घटनाका रूपमा उल्लेख गरेका छन्।

उनले सरकारलाई प्रश्न गर्दै भनेका छन्, ‘जेनजीले खोजेको रोजगारी कहाँ सिर्जना भयो? उनीहरूले चाहेको सुशासन कहाँ छ? विदेशिन बाध्य युवालाई स्वदेश फर्काउने योजना कहाँ छ?’

आङ्देम्बेले निर्वाचनअघि सत्तारूढ राष्ट्रिय स्वतन्त्र पार्टीका सभापति रवि लामिछानेले अमेरिका, क्यानडा र युरोपका विभिन्न देशमा पुगेर सरकार बनेको १०० दिनभित्र विदेशिएका नेपाली युवालाई स्वदेश फर्काउने र देशमै रोजगारी सिर्जना गर्ने घोषणा गरेको स्मरण गराए।

सरकार गठन भएको साढे चार महिना बितिसक्दा पनि एक जना युवालाई समेत स्वदेश फर्काउन नसक्नु गम्भीर प्रश्न भएको उनको टिप्पणी छ।

‘चुनावअघि अमेरिका, क्यानडा र युरोपका गल्लीगल्लीमा पुगेर सरकार बनेको १०० दिनमै स्टिकर टाँस्ने र विदेशिएका नेपाली युवालाई स्वदेश फर्काउने घोषणा सत्तारूढ दलकै नेतृत्वले गरेका थिए, जुन कुरा युवाजनले बिर्सिएका छैनन्,’ उनले भनेका छन्।

आङ्देम्बेले युवालाई केवल मतदान गर्ने जमातका रूपमा नभई राष्ट्र निर्माणको नेतृत्व गर्ने शक्तिका रूपमा राज्यले स्वीकार गर्नुपर्ने बताएका छन्।

विदेशबाट फर्किएका युवाको ज्ञान, सीप, प्रविधि र पुँजीलाई स्वदेशमै परिचालन गर्न ‘रिटर्नी युवा उद्यमशीलता’सम्बन्धी ठोस नीति आवश्यक रहेको उनले बताएका छन्।

अन्तर्राष्ट्रिय युवा दिवस युवाले नेपालमै आफ्नो भविष्य देख्न सक्ने वातावरण निर्माण गर्ने प्रतिबद्धता जनाउने दिन बन्नुपर्ने भन्दै आङ्देम्बेले शुभकामना व्यक्त गरेका छन्।

Originally published on abcnews.com.np.