काठमाडौँ । जापानमा आयोजना हुने ‘नागोया वुमेन्स म्याराथन २०२७’ मा नेपाली महिला धाविकाले पनि सहभागी हुन पाउने भएका छन्। प्रतियोगिताको अन्तर्राष्ट्रिय सहभागिताका लागि मंगलबारदेखि आवेदन खुला गरिएको छ।

गिनिज वर्ल्ड रेकर्डबाट विश्वकै ठूलो ‘अल–वुमन म्याराथन’का रूपमा प्रमाणित नागोया वुमेन्स म्याराथन आगामी मार्च १४, २०२७ मा जापानको आइची प्रान्तस्थित नागोयामा आयोजना हुँदैछ।

विश्व एथलेटिक्सको ‘प्लाटिनम लेबल रोड रेस’ समेत रहेको प्रतियोगितामा विश्वस्तरीय धाविकासँगै पहिलोपटक म्याराथन दौडन लागेका तथा व्यक्तिगत उत्कृष्ट समय निकाल्ने लक्ष्य राखेका धाविकाले सहभागिता जनाउनेछन्।

आयोजकले सन् २०२७ का लागि प्रतियोगिताको क्षमता दुई हजारले बढाएर २२ हजार धाविका पुर्‍याएको छ। प्रतियोगितामा १९ देखि ८० वर्षसम्मका महिलाले एउटै ४२.१९५ किलोमिटर दूरीमा प्रतिस्पर्धा गर्नेछन्।

दौड पूरा गर्ने धाविकालाई विशेष उपहार

नागोया वुमेन्स म्याराथनको अर्को आकर्षण दौड पूरा गर्ने प्रत्येक धाविकालाई प्रदान गरिने विशेष उपहार हो। आयोजकका अनुसार फ्रान्सेली लक्जरी ब्रान्ड बाकारातले प्रतियोगिताका लागि तयार पारेको विशेष क्रिस्टल टम्बलर प्रत्येक ‘फिनिसर’लाई प्रदान गरिनेछ।

सन् २०२७ का लागि तयार पारिएको टम्बलरको डिजाइन दौडको अघिल्लो दिन आयोजना हुने म्याराथन एक्स्पोमा सार्वजनिक गरिनेछ।

दौडको सुरुआत र समापन भेन्टेलिन डोम नागोयामा हुनेछ। ढाकिएको बेसबल रंगशाला भएकाले प्रतिकूल मौसमका कारण हुने जोखिमसमेत केही हदसम्म कम हुने आयोजकको अपेक्षा छ।

सन् २०२६ को संस्करणमा ९६.६ प्रतिशत सहभागीले दौड पूरा गरेका थिए।

म्याराथनसँगै विभिन्न कार्यक्रम

म्याराथन सप्ताहन्तमा धाविकासँगै उनीहरूका परिवार र समर्थकलाई लक्षित गरी विभिन्न कार्यक्रमसमेत आयोजना गरिनेछन्।

शुक्रबारदेखि सुरु हुने म्याराथन एक्स्पोमा ‘गो रनवे’ फेसन शो तथा लोकप्रिय गायक–गायिकाको प्रस्तुति लगायतका कार्यक्रम राखिएका छन्।

मुख्य महिला म्याराथनकै दिन पुरुष धावकका लागि भने नागोया सिटी म्याराथन आयोजना हुनेछ। त्यस्तै इच्छुक धावकले हाफ म्याराथन वा ८.५ किलोमिटरको नागोया रनमा पनि सहभागिता जनाउन सक्नेछन्।

नेपाली धाविकाले कसरी आवेदन दिने?

नागोया वुमेन्स म्याराथन २०२७ को अन्तर्राष्ट्रिय प्रवेशका लागि प्रारम्भिक आवेदन अगस्ट ११ देखि २४, २०२६ सम्म खुला रहनेछ। प्रारम्भिक प्रवेश शुल्क २४ हजार जापानी येन तोकिएको छ।

नियमित आवेदन भने अगस्ट २५ देखि सेप्टेम्बर २३ सम्म खुला रहनेछ, जसका लागि २५ हजार जापानी येन शुल्क तोकिएको छ। दुवै शुल्कमा अतिरिक्त प्रशोधन शुल्क लाग्ने आयोजकले जनाएको छ।

अन्तर्राष्ट्रिय धाविकाका लागि ३ हजार ५०० स्थान छुट्याइएको छ र आवेदन ‘पहिलो आउनेलाई पहिलो प्राथमिकता’का आधारमा स्वीकार गरिनेछ।

त्यसैगरी नागोया सिटी म्याराथनका लागि पनि अन्तर्राष्ट्रिय आवेदन अगस्ट ११ देखि सेप्टेम्बर २३ सम्म खुला रहनेछ। हाफ म्याराथनका लागि १७ हजार येन र ८.५ किलोमिटरको नागोया रनका लागि १३ हजार येन शुल्क तोकिएको छ।

हाफ म्याराथनमा ३०० तथा नागोया रनमा १०० अन्तर्राष्ट्रिय धावकका लागि स्थान उपलब्ध गराइएको छ।

Originally published on abcnews.com.np.