काठमाडौँ । प्रधानन्यायाधीश डा. मनोजकुमार शर्माले कानुन व्यवसायीहरूले न्यायिक मर्यादा र व्यावसायिक निष्ठालाई केन्द्रमा राखेर आफ्नो जिम्मेवारी निर्वाह गर्नुपर्ने बताएका छन्।

नेपाल कानुन व्यवसायी परिषद्को ३३औँ स्थापना दिवसका अवसरमा आयोजित कार्यक्रममा बोल्दै प्रधानन्यायाधीश शर्माले कानुन व्यवसायीहरू नैतिक मूल्य–मान्यताप्रति प्रतिबद्ध भएर काम गरेमा न्यायिक मर्यादा कायम राख्न महत्वपूर्ण योगदान पुग्ने बताए।

उनले कानुन व्यवसायीलाई स्वतन्त्र, निष्पक्ष र इमानदारीपूर्वक कानुन व्यवसाय सञ्चालन गर्न आग्रह गरे। परिषद्को निरन्तर विकास र उन्नतिको कामना गर्दै उनले स्थापना दिवसलाई आत्ममूल्याङ्कन गर्ने अवसरका रूपमा लिनुपर्ने बताए।

प्रधानन्यायाधीश शर्माले परिषद्को काममा पारदर्शिता र जवाफदेहिताको अभ्यासलाई अझ प्रभावकारी बनाउनुपर्नेमा समेत जोड दिए।

‘लाइसेन्स दिने मात्रै होइन, व्यावसायिक सुरक्षामा पनि काम गर्नुपर्छ’

कानुन, न्याय तथा संसदीय मामिलामन्त्री सोविता गौतमले नेपाल कानुन व्यवसायी परिषद्ले तीन दशकदेखि निरन्तर रूपमा काम गर्दै आएको उल्लेख गर्दै यसले न्यायिक समाजको मार्गदर्शकका रूपमा भूमिका निर्वाह गरिरहेको बताइन्।

उनले आगामी दिनमा परिषद्को भूमिका कानुन व्यवसायीलाई अनुमतिपत्र दिने कार्यमा मात्र सीमित हुन नहुने बताउँदै उनीहरूको व्यावसायिक सुरक्षा र क्षमता अभिवृद्धिका लागि समेत प्रभावकारी काम गर्नुपर्ने धारणा राखिन्।

प्रदेश तहसम्म संरचना विस्तार गर्ने प्रतिबद्धता

महान्यायाधिवक्ता तथा परिषद्का अध्यक्ष डा. नारायणदत्त कँडेलले परिषद्ले आगामी दिनमा थप व्यावसायिक, पारदर्शी र जवाफदेही ढङ्गले काम गर्ने प्रतिबद्धता व्यक्त गरे।

उनले परिषद्को संरचना प्रदेश तहसम्म विस्तार गर्ने योजना रहेको जानकारी दिँदै सक्षम, दक्ष र मर्यादित कानुन व्यवसायी उत्पादनमार्फत विधिको शासन सुदृढ बनाउन योगदान गर्ने बताए।

कानुन व्यवसायको गुणस्तर सुधार गर्न परिषद्ले आवश्यक नीति तथा कार्यक्रम अघि बढाउने उनको भनाइ थियो।

बार एसोसिएसनले परिषद्को कामको प्रशंसा गर्‍यो

नेपाल बार एसोसिएसनका अध्यक्ष प्रा. डा. विजयप्रसाद मिश्रले परिषद्ले पारदर्शी ढङ्गले काम गरिरहेको बताए।

उनले कानुन व्यवसायीको हकहित र व्यावसायिक अधिकार संरक्षणका लागि नेपाल बार एसोसिएसनले निरन्तर काम गर्दै आएको उल्लेख गरे।

कार्यक्रममा लामो समयदेखि कानुन व्यवसायमा सक्रिय रहेका वरिष्ठ कानुन व्यवसायी तथा परिषद्को परीक्षामा उत्कृष्ट अङ्क ल्याउने विद्यार्थीलाई सम्मान तथा पुरस्कार प्रदान गरिएको थियो।

२४ हजारभन्दा बढी कानुन व्यवसायी आबद्ध

परिषद्का सदस्य तथा वरिष्ठ अधिवक्ता रविनारायण खनालले कानुन व्यवसायीको क्षमता अभिवृद्धिका लागि परिषद्ले विभिन्न कार्यक्रम सञ्चालन गर्दै आएको जानकारी दिए।

उनका अनुसार विसं २०५१ साउन २७ गते स्थापना भएको नेपाल कानुन व्यवसायी परिषद्मा हाल २४ हजारभन्दा बढी कानुन व्यवसायी आबद्ध छन्।

परिषद्ले कानुन व्यवसायमा प्रवेशका लागि परीक्षा सञ्चालन गर्नुका साथै व्यवसायीको व्यावसायिक क्षमता अभिवृद्धि र आचारसंहिता पालना सुनिश्चित गर्न विभिन्न कार्यक्रम गर्दै आएको उनले बताए।

५० वर्षे कानुनी यात्रामा सम्मान

स्थापना दिवसका अवसरमा कानुन व्यवसायमा ५० वर्ष पूरा गरेका अनुभवी कानुन व्यवसायीहरूलाई सम्मान गरिएको थियो।

त्यस्तै, परिषद्ले सञ्चालन गरेको परीक्षामा उत्कृष्ट नतिजा हासिल गर्ने विद्यार्थीलाई समेत पुरस्कार तथा सम्मान प्रदान गरिएको थियो।

कार्यक्रमका वक्ताहरूले कानुन व्यवसायको गुणस्तर, व्यावसायिक आचारसंहिता, पारदर्शिता र जवाफदेहिता सुदृढ गर्न सकेमा मात्रै न्याय प्रणालीप्रतिको जनविश्वास थप बलियो हुनेमा जोड दिएका थिए।

Originally published on abcnews.com.np.