रोल्पाको थबाङ गाउँपालिकामा गएराति आएको पहिरोले ज्यान गुमाउने र बेपत्ता हुनेहरूको सूची प्रहरीले सार्वजनिक गरेको छ। पहिरोमा परेर तीन जनाको मृत्यु भएको छ, जबकि नौ जना अझै बेपत्ता रहेका छन्।

जिल्ला प्रहरी कार्यालय रोल्पाका सूचना अधिकारी प्रहरी निरीक्षक कृष्ण श्रेष्ठका अनुसार थवाङ गाउँपालिका- ५ कोटलबारामा गएराति परेको अविरल वर्षासँगै आएको पहिरोले घर तथा गोठहरु पुरिएपछि मानवीय क्षति भएको हो। बुधवार राति ८:४० बजेतिर पहिरो खस्दा स्थानीय कमलबहादुर पुन मगरको घरसहित छवटा घरगोठ पुरिएको थियो। ती घर-गोठमा मानिस र पशुचौपायाहरू पनि पुरिएका छन्।

पहिरोमा ज्यान गुमाउनेहरूको नाममा शान्ती पुन मगर (१८ वर्ष) र मनरखी पुन मगर (७१ वर्ष) रहेका छन्। घाइतेमध्ये संजय घर्ती मगर (२५ वर्ष) लाई प्रहरी र स्थानीयको सहयोगमा उद्दार गरेर उपचारका लागि पठाइएको छ, उनको अवस्था गम्भीर रहेको बताइएको छ।

बेपत्ता हुनेहरूको विवरण

पहिरोमा बेपत्ता हुनेहरूमा कमल पुन मगरको छोरी जुन कुमारी पुन मगर (४० वर्ष), अशिम पुन मगर (९ वर्ष), अशोक पुन मगर (६ वर्ष), डल बहादुर पुन मगर (७५ वर्ष), अजम्बर पुन मगर (८० वर्ष), बल बहादुर पुन मगर (७८ वर्ष), लिल बहादुर पुन मगर (७२ वर्ष), मनि पुन मगर (७१ वर्ष) र हस्तकला रोका मगर (६७ वर्ष) छन्। प्रहरीले बेपत्ता भएका व्यक्तिहरूलाई खोज्ने कार्य जारी राखेको छ।

Originally published on abcnews.com.np.