नवलपुर, साउन २८ गते । देशकै लामो, फराकिलो र नयाँ नारायणघाट–बुटवल सडकखण्ड विस्तारको काम अन्तिम चरणमा पुगेको छ। सडक आयोजनाका अनुसार हालसम्म करिब ९३ प्रतिशत काम सम्पन्न भइसकेको छ।

आयोजनाअन्तर्गत अहिले सडकमा रङरोगन गर्ने, बिरुवा तथा दुबो रोप्ने, जेब्रा क्रसिङ निर्माण गर्ने र विभिन्न स्थानमा गति सीमा तोकिएका बोर्ड राख्ने काम भइरहेको छ।

सडकमा सवारीसाधनको गति स्थानअनुसार निर्धारण गरिएको छ। जंगल क्षेत्रमा अधिकतम ४० किलोमिटर प्रतिघण्टा, बजार क्षेत्रमा ६० किलोमिटर र सडकको अवस्था तथा सवारी चापअनुसार अन्य स्थानमा अधिकतम ८० किलोमिटर प्रतिघण्टासम्म गति सीमा तोकिएको जिल्ला ट्राफिक प्रहरी कार्यालयले जनाएको छ।

जिल्ला ट्राफिक प्रहरी कार्यालयका प्रमुख प्रहरी निरीक्षक कुशल बर्तौलाका अनुसार दाउन्ने क्षेत्रमा अधिकतम ४० किलोमिटर प्रतिघण्टा र बजार तथा राजमार्ग वारपार गर्ने स्थानमा ६० किलोमिटर प्रतिघण्टा गति सीमा कायम गरिएको छ। ट्राफिक प्रहरीले ‘राडार गन’ प्रयोग गरी सवारीसाधनको गति नियमन गर्दै आएको छ।

जंगलमा किन ४० किलोमिटर गति सीमा?

जंगल क्षेत्र खुला सडकजस्तै देखिए पनि वन्यजन्तुको आवतजावत हुने भएकाले गति सीमा निर्धारण गरिएको प्रहरी निरीक्षक बर्तौलाले बताउनुभयो।

वन्यजन्तुको आवतजावत हुने क्षेत्रमा तीव्र गतिमा सवारीसाधन चलाउँदा दुर्घटनाको जोखिम बढ्ने भएकाले चालकलाई तोकिएको गति सीमाको पालना गर्न आग्रह गरिएको छ।

वन्यजन्तुका लागि संरचना अभाव

एसियाली राजमार्गका रूपमा विस्तार भइरहेको सडकमा वन्यजन्तुको सुरक्षित आवतजावतका लागि अन्तर्राष्ट्रिय मापदण्डअनुसारका संरचना भने पर्याप्त छैनन्।

घना जंगल तथा वन्यजन्तुको आवतजावत हुने स्थानमा सामान्यतः ‘अन्डरपास’ तथा ‘ओभरहेड ब्रिज’ निर्माण गर्ने अभ्यास भए पनि करिब ११४ किलोमिटर लामो सडकखण्डमा त्यस्ता संरचना निर्माण गरिएको छैन।

सडक विभाग आयोजना निर्देशनालय (एडीबी) का आयोजना निर्देशक इन्जिनियर चुडाराज ढकालका अनुसार वन्यजन्तुका लागि अन्डरपास तथा ओभरहेड ब्रिज निर्माण गर्ने विषय मूल सम्झौतामा समावेश थिएन।

पछि थप संरचना निर्माणका लागि आग्रह गर्दा चिनियाँ ठेकेदार कम्पनीले लागत बढ्ने भन्दै असहमति जनाएको उहाँले बताउनुभयो। यद्यपि, ४३ वटा पुलमा सामान्य सुधार गरी साना वन्यजन्तु ओहोरदोहोर गर्न सक्ने व्यवस्था गरिएको उहाँको दाबी छ।

पितौँजी जंगलमा आकाशे पुल

आयोजना निर्देशक ढकालका अनुसार गैँडाकोटस्थित पितौँजी जंगलमा बाँदरलाई सुरक्षित रूपमा ओहोरदोहोर गर्न सहज होस् भनेर एउटा आकाशे पुल निर्माण गरिएको छ।

उहाँले ठूला वन्यजन्तुका लागि सडकको संरचना र साना वन्यजन्तुका लागि अन्य विकल्प प्रयोग गर्न सकिने बताउनुभयो। साथै, वन्यजन्तु र मानव बस्तीबीचको बढ्दो द्वन्द्वलाई ध्यानमा राखेर पूर्वाधार विकास र संरक्षणबीच सन्तुलन आवश्यक रहेको उहाँको भनाइ छ।

मुख्य बजारमा ६ लेन

नारायणघाट–बुटवल सडकखण्डको मुख्य बजार क्षेत्रमा छ लेन, अन्य क्षेत्रमा चार लेन र दाउन्ने क्षेत्रमा तीन लेनको सडक निर्माण भइरहेको छ।

आयोजना अन्तिम चरणमा पुगेसँगै सडकको रङरोगन, सडक सुरक्षा चिह्न, जेब्रा क्रसिङ, हरियाली व्यवस्थापन र गति सीमा संकेत राख्ने कामलाई प्राथमिकता दिइएको छ।

Originally published on abcnews.com.np.