काठमाडौं । नेपाली कांग्रेसका नेता डा. शशांक कोइरालाले शेरबहादुर देउवा नै नेपाली कांग्रेसको वैधानिक सभापति रहेको दाबी गरेका छन्।

बिहीबार देउवा स्वदेश फर्किने क्रममा त्रिभुवन अन्तर्राष्ट्रिय विमानस्थलमा स्वागतका लागि पुगेका नेता कोइरालाले सभापतिको जिम्मेवारीका विषयमा कुनै कानुनी अड्चन वा ‘स्टे अर्डर’ नरहेको जिकिर गरेका हुन्।

उनले देउवा नेतृत्वमै पार्टीलाई बलियो बनाउनुपर्नेमा जोड दिँदै कांग्रेसभित्रको आन्तरिक एकताका लागि सबै पक्षलाई समेटेर अघि बढ्नुपर्ने बताए।

कोइरालाले पार्टीबाट अलग भएका पक्षलाई पुनः मूलधारमा ल्याउनुपर्ने उल्लेख गर्दै पार्टीलाई एक ढिक्का बनाउने प्रयास जारी रहने बताए।

संस्थापन समूहप्रति लक्षित गर्दै उनले भने, “सानेपा कांग्रेस छुट्टिएर गएको छ, उनीहरू आउनुपर्ने हो। उनीहरूले अनादर गर्छन्, के गर्छन् उनीहरूको कुरा हो। देउवा पार्टीको सभापति नै हो। अहिले पनि नेपाली कांग्रेसका सभापति शेरबहादुर देउवा नै हो।”

उनले सभापतिको विषयमा अदालतबाट कुनै ‘स्टे अर्डर’ आएको छ कि छैन भन्ने प्रश्नसमेत उठाए।

नेता कोइरालाले पार्टीभित्रको असन्तुष्टिलाई संवादमार्फत समाधान गर्नुपर्नेमा जोड दिँदै ढिलोचाँडो सबै पक्ष एक ठाउँमा आउनुको विकल्प नरहेको बताए। पार्टीको आन्तरिक एकता कायम गरी कांग्रेसलाई थप सुदृढ बनाउने प्रयास जारी रहने उनको भनाइ छ।

Originally published on abcnews.com.np.