काठमाडौँ । थाइल्यान्डबाट पार्सलमार्फत ल्याइएको गाँजा बुझ्न पुगेका दुई युवकलाई प्रहरीले रुपन्देहीबाट पक्राउ गरेको छ।

लागूऔषध नियन्त्रण ब्यूरोका अनुसार साउन २४ गते थाइल्यान्डबाट त्रिभुवन अन्तर्राष्ट्रिय विमानस्थलमा आएको पार्सल जाँच गर्दा गाँजा फेला परेको थियो। त्यसपछि प्रहरीले पार्सल बुझ्न आउने व्यक्तिमाथि निगरानी बढाएको थियो।

पार्सल बुझ्न रुपन्देहीको सिद्धार्थनगर नगरपालिका–८ पुगेका दुई युवकलाई प्रहरीले पक्राउ गरेको हो। पक्राउ पर्नेमा रुपन्देहीको लुम्बिनी सांस्कृतिक नगरपालिका–१० का २३ वर्षीय मनोहर हरिजन र भारतको उत्तर प्रदेशस्थित बस्ती परसरामपुरका १८ वर्षीय निखित वर्मा रहेका छन्।

लागूऔषध नियन्त्रण ब्यूरोका प्रवक्ता प्रहरी उपरीक्षक दुर्गाराज रेग्मीका अनुसार उनीहरूको साथबाट ३.२ किलोग्राम गाँजा र दुई थान मोबाइल फोन बरामद भएको छ।

प्रहरीले पक्राउ परेका दुवै जनामाथि थप अनुसन्धान अघि बढाएको जनाएको छ। पार्सलमार्फत लागूऔषध ल्याउने कार्यमा उनीहरूको संलग्नता तथा अन्य व्यक्तिको भूमिकाबारे समेत अनुसन्धान भइरहेको प्रहरीले जनाएको छ।

Originally published on abcnews.com.np.