दमौली (तनहुँ) । अर्थमन्त्री डा. स्वर्णिम वाग्लेले नेपालकै आन्तरिक आम्दानीबाट देशको विकास गर्ने लक्ष्यका साथ सरकारले नयाँ बजेट ल्याएको बताउनुभएको छ।

तनहुँमा जिल्ला समन्वय समितिको वार्षिक समीक्षा कार्यक्रमको बिहीबार उद्घाटन गर्दै उहाँले राज्यको कमजोर आम्दानीका कारण विगतमा ऋण लिएर दैनिक खर्च चलाउनुपर्ने अवस्था अन्त्य गर्न करको दायरा विस्तार गर्ने नीति लिइएको बताउनुभयो।

अर्थमन्त्री वाग्लेले जनताको विकास आकांक्षाको तुलनामा मुलुकको आर्थिक सामर्थ्य कमजोर रहेको र दातृ निकायबाट प्राप्त हुने ऋणसमेत महँगो बन्दै गएकाले नेपाल आफैं आर्थिक रूपमा सक्षम बन्नुको विकल्प नरहेको धारणा राख्नुभयो।

उहाँका अनुसार राज्यको अत्यावश्यक दायित्व करिब १ हजार ३ सय ५० अर्ब रुपैयाँ रहे पनि सरकारको आम्दानी करिब १ हजार २ सय ५० अर्ब रुपैयाँ मात्रै छ। नियमित दायित्व पूरा गर्नसमेत ऋण लिनुपर्ने अवस्था रहेकाले करको दायरा फराकिलो बनाउँदै नागरिकलाई कर तिर्न प्रोत्साहित गर्ने कार्यक्रम ल्याइएको उहाँले बताउनुभयो।

निजी क्षेत्रलाई प्रोत्साहन

करको दायरा विस्तार गर्दा त्यसबाट सर्वसाधारणमा पर्न सक्ने आर्थिक भारप्रति सरकार सचेत रहेको अर्थमन्त्री वाग्लेले बताउनुभयो। अन्तिम करको दायित्वबाट सर्वसाधारणलाई जोगाउन सरकार प्रतिबद्ध रहेको उहाँको भनाइ छ।

सरकारले २१ खर्ब २४ अर्ब रुपैयाँको बजेटमार्फत निजी क्षेत्रलाई प्रोत्साहन गर्दै करिब ६६ खर्ब रुपैयाँको अर्थतन्त्रलाई चलायमान बनाउने लक्ष्य लिएको उहाँले स्पष्ट पार्नुभयो।

अर्थमन्त्री वाग्लेले गैरआवासीय नेपाली तथा प्रवासी नेपालीलाई नेपालमा लगानी गर्न अनुकूल वातावरण निर्माण गर्ने काम छिट्टै अघि बढाइने जानकारीसमेत दिनुभयो।

Originally published on abcnews.com.np.