काठमाडौं । नेपाली कांग्रेसका पूर्वसभापति शेरबहादुर देउवाले पार्टीभित्र एकता कायम गर्दै राष्ट्रिय एकता र सहकार्यलाई बलियो बनाउन आह्वान गरेका छन् ।

करिब साढे पाँच महिनापछि काठमाडौं फर्किएका देउवाले आफू शक्ति प्राप्तिका लागि नभई राष्ट्रिय एकता सुदृढ गर्न सक्रिय हुन फर्किएको बताएका छन् ।

कांग्रेसभित्र एकता र सहकार्यमा जोड

देउवाले कांग्रेस एकताबद्ध भएर देशमा क्रियाशील सबै राजनीतिक दलसँग सहमति र सहकार्य गर्दै अघि बढ्नुपर्ने आवश्यकता औँल्याएका छन् ।

पार्टीभित्र देखिएका असहमति र निराशालाई तत्काल सम्बोधन गर्नुपर्ने बताउँदै उनले मुलुकको प्रमुख राजनीतिक दलभित्र विवाद बढ्दा राष्ट्रियता नै कमजोर हुनसक्ने धारणा राखेका छन् ।

उनले कांग्रेसका नेता, कार्यकर्ता, शुभेच्छुक तथा समर्थक–मतदातालाई पार्टीलाई सामूहिक विश्वासको आधारमा अघि बढाउन आग्रह गरेका छन् ।

जनताको हित सर्वोपरि

देउवाले कांग्रेस कुनै व्यक्तिको इगो वा स्वार्थमा नभई जनताको सर्वोपरि हितलाई केन्द्रमा राखेर अघि बढ्नुपर्ने बताए ।

आफू सत्ता र शक्ति प्राप्त गर्न नभई राष्ट्रिय एकता सुदृढ गर्ने उद्देश्यसहित सक्रिय भएको उनको भनाइ छ ।

उनले २०३३ सालमा बीपी कोइराला राष्ट्रिय एकता तथा मेलमिलापको नीति लिएर स्वदेश फर्किएको प्रसङ्ग स्मरण गर्दै अहिले पनि देशमा सर्वपक्षीय राष्ट्रिय एकताको आवश्यकता रहेको बताए ।

राष्ट्र, लोकतन्त्र र विधिको शासनप्रति प्रतिबद्ध

देउवाले आफू नेता बन्ने उद्देश्यले मात्र नभई यस महान् राष्ट्रको आजीवन नागरिकका रूपमा फर्किएको बताएका छन् ।

उनले राष्ट्र, राष्ट्रियता, लोकतन्त्र र विधिको शासनप्रति आफ्नो अटुट प्रतिबद्धता रहेको दोहोर्याउँदै आगामी दिनमा पनि यिनै विषयलाई केन्द्रमा राखेर अघि बढ्ने धारणा व्यक्त गरेका छन् ।

Originally published on abcnews.com.np.