काठमाडौं । अर्थमन्त्री डा. स्वर्णिम वाग्लेले नेपालकै आम्दानीबाट देश विकास गर्ने उद्देश्यसहित सरकारले नयाँ बजेट ल्याएको बताएका छन्।

बिहीबार आफ्नो निर्वाचन क्षेत्र तनहुँ पुगेका अर्थमन्त्री वाग्लेले जिल्ला समन्वय समिति तनहुँको वार्षिक समीक्षा कार्यक्रम उद्घाटन गर्दै राज्यको आम्दानी बढाएर आफ्नै स्रोतबाट विकास गर्ने नीति सरकारले लिएको बताए।

उनका अनुसार विगतमा राज्यको कमजोर आम्दानीका कारण ऋण लिएर दैनिक अत्यावश्यक खर्चसमेत धान्नुपर्ने अवस्था थियो। अब करको दायरा फराकिलो बनाउँदै थोरै–थोरै योगदानबाट सरकारी आम्दानी बढाउने र त्यसैबाट देश विकास गर्ने नीति लिइएको उनले बताए।

आम्दानीभन्दा दायित्व बढी

अर्थमन्त्री वाग्लेले सरकारको नियमित तथा अत्यावश्यक दायित्व करिब १३ खर्ब ५० अर्ब रुपैयाँ रहेको तर सरकारको आम्दानी १२ खर्ब ५० अर्ब रुपैयाँ हाराहारी मात्र रहेको बताए।

‘अहिले हामीले करको दर फराकिलो बनाएको र कर तिर्न प्रोत्साहनका कार्यक्रम ल्याएको यसैका लागि हो,’ उनले भने।

दातृ निकायबाट प्राप्त हुने ऋणसमेत महँगो हुँदै गएको भन्दै वाग्लेले मुलुक आफैँ आर्थिक रूपमा सक्षम बन्नुपर्ने आवश्यकता औँल्याए।

निजी क्षेत्रलाई प्रोत्साहन

सरकारले २१ खर्ब २४ अर्ब रुपैयाँको बजेटमार्फत निजी क्षेत्रलाई उत्साहित गर्दै करिब ६६ खर्ब रुपैयाँको अर्थतन्त्रलाई चलायमान बनाउन खोजेको उनले बताए।

उनले प्रवासी नेपालीलाई नेपालमा लगानी गर्न आकर्षित गर्ने वातावरण निर्माणको कामसमेत अघि बढाइने जानकारी दिए।

करको दायरा विस्तार

करको दायरा विस्तार गर्दा नयाँ क्षेत्रमा कर थपिएको भन्ने गुनासोप्रति सरकारले ध्यान दिएको भन्दै अर्थमन्त्री वाग्लेले सर्वसाधारणलाई अनावश्यक करको भार नपर्ने गरी अन्तिम कर दायित्वबाट बचाउने व्यवस्था गरिने बताए।

उनले ‘ऋण लिनु हुँदैन, तर विकास चाहिँ गरिदिनुपर्छ’ भन्ने सोचबाट माथि उठ्नुपर्नेमा जोड दिँदै आफ्नै स्रोत र साधनबाट देश विकास गर्नुपर्ने बताए।

Originally published on abcnews.com.np.