काठमाडौं । नेपाली कांग्रेसले १५औँ महाधिवेशनका लागि यसअघि तय गरिएको मिति कायम राख्दै तल्लो तहका अधिवेशनको कार्यतालिका परिमार्जन गर्ने विषयमा छलफल थालेको छ।

बिहीबार पार्टी केन्द्रीय कार्यालय सानेपामा जारी केन्द्रीय कार्यसमिति बैठकपछि सञ्चारकर्मीसँग कुरा गर्दै महामन्त्री प्रदीप पौडेलले आगामी असोज १६, १७, १८ र १९ गतेका लागि तय गरिएको केन्द्रीय महाधिवेशनको मिति परिवर्तन नहुने बताए।

उनका अनुसार महाधिवेशनको पूर्वनिर्धारित मिति कायम राखेर त्यसअघिका तल्लो तहका अधिवेशनको कार्यतालिकामा सामान्य हेरफेर गर्ने विषयमा बैठकमा छलफल भइरहेको छ।

क्रियाशील सदस्यतामा पनि छलफल

केन्द्रीय कार्यसमिति बैठकमा क्रियाशील सदस्यता नवीकरण तथा नयाँ सदस्यता वितरणको विषयले पनि प्राथमिकता पाएको छ।

पौडेलका अनुसार ७७ वटै जिल्लामा खटिएका केन्द्रीय प्रतिनिधिले सदस्यता अद्यावधिक तथा वितरणका क्रममा देखिएका समस्या र वस्तुस्थितिबारे धारणा तथा सुझाव दिएका छन्।

उनले भने, ‘सदस्यता वितरण र अद्यावधिकको मुख्य कार्य सम्पन्न भइसकेको छ। अहिले सदस्यता सूचीमा सच्याउनुपर्ने प्राविधिक पक्ष, समावेश गर्न छुटेका विवरण र अन्य सांगठनिक विषयमा बैठक केन्द्रित छ।’

बैठकमा महाधिवेशनको कार्यतालिका र क्रियाशील सदस्यतासँगै समसामयिक राजनीतिक तथा सांगठनिक विषयमा पनि केन्द्रीय सदस्यहरूले धारणा राखिरहेका छन्।

Originally published on abcnews.com.np.