काठमाडौं । राष्ट्रिय स्वतन्त्र पार्टीका सांसद केपी खनालले संसदीय कृषि तथा प्राकृतिक स्रोत समितिको बैठकमा कृषिमन्त्री र कृषि सचिवको अनिवार्य उपस्थिति हुनुपर्ने माग गरेका छन्।

बिहीबार बसेको समिति बैठकमा बोल्दै खनालले सम्बन्धित मन्त्रालयका मन्त्री र सचिवको उपस्थितिबिना गरिने छलफलले प्रभावकारी नीतिगत निष्कर्ष निकाल्न नसक्ने बताए।

उनले आगामी बैठकमा कृषिमन्त्री र सचिवलाई अनिवार्य रूपमा उपस्थित गराउन समिति सभापति अशोककुमार चौधरीको ध्यानाकर्षण गराए। मन्त्री तथा सचिवको उपस्थितिलाई प्राथमिकता नदिइए समितिको प्रभावकारितामाथि नै प्रश्न उठ्ने उनको भनाइ थियो।

कृषि क्षेत्रसँग प्रत्यक्ष जोडिएको मलसम्बन्धी विषयमा मन्त्रालयका जिम्मेवार अधिकारीलाई सुरुदेखि नै छलफलमा सहभागी नगराउँदा पुरानो र नयाँ अभ्यासबीच फरक नहुने खनालले बताए।

उनले समितिको बैठकलाई औपचारिकतामा मात्र सीमित नगर्न आग्रह गर्दै भने, ‘हामीले समितिमा यत्रो दिन बहस गर्यौँ, समितिका धेरै कुराहरू लागू भएका छन् त? अब आउने छलफलमा मन्त्रीज्यूको पनि उपस्थिति हुनुपर्छ, सचिवज्यूको पनि उपस्थिति हुनुपर्छ।’

मलको समस्या समाधान गर्न गम्भीर बहस आवश्यक

खनालले नेपाललाई कृषि प्रधान देश भनिए पनि किसानले मल नपाएको गुनासो निरन्तर आइरहेको बताए।

मलको उपलब्धता, जैविक तथा प्राङ्गारिक मलको प्रवर्द्धन र रासायनिक मलमाथिको निर्भरता घटाउने विषयमा समितिले गम्भीर छलफल गर्नुपर्ने उनको भनाइ छ।

समिति सभापति अशोककुमार चौधरीले भने यसअघिको छलफलमा कृषिमन्त्री र सचिवलाई नबोलाइएको जानकारी दिँदै आगामी बैठकमा उनीहरूलाई उपस्थित गराउने प्रतिबद्धता जनाएका छन्।

Originally published on abcnews.com.np.