धनगढी । सुदूरपश्चिम प्रदेशका मुख्यमन्त्री कमलबहादुर शाहले पदबाट राजीनामा दिएका छन्। बिहीबार विश्वासको मत लिने प्रयोजनका लागि बोलाइएको प्रदेशसभा बैठकलाई सम्बोधन गर्दै शाहले राजीनामाको घोषणा गरेका हुन्।

प्रदेशसभा बैठकबाट बाहिरिएलगत्तै उनले प्रदेश प्रमुख नजिर मियाँसमक्ष राजीनामा बुझाएका छन्। उनको राजीनामासँगै सुदूरपश्चिममा नयाँ सरकार गठनको प्रक्रिया अघि बढ्ने भएको छ।

सत्ता साझेदार नेकपा (एमाले) ले समर्थन फिर्ता लिएपछि मुख्यमन्त्री शाह नेतृत्वको सरकार अल्पमतमा परेको थियो। मन्त्री बर्खास्तीको विषय र आर्थिक वर्ष २०८३/८४ को बजेटलाई लिएर कांग्रेस र एमालेबीच विवाद चर्किएपछि असार ३२ गते एमालेले सरकारलाई दिएको समर्थन फिर्ता लिएको थियो।

समर्थन फिर्ता लिएपछि संवैधानिक व्यवस्थाअनुसार मुख्यमन्त्री शाहले ३० दिनभित्र प्रदेशसभाबाट विश्वासको मत लिनुपर्ने अवस्था थियो। तर आवश्यक बहुमत जुट्ने सम्भावना कमजोर भएपछि उनले समयसीमाको अन्तिम दिन राजीनामा दिएका हुन्।

प्रदेशसभालाई सम्बोधन गर्दै शाहले आफ्नो सरकार ढल्नुमा एमालेको भूमिकामाथि कडा टिप्पणी गरे। उनले एमालेले सरकारमा सहभागी भएर बजेट निर्माणका क्रममा सहकार्य गर्ने तर पछि बजेटकै विषयलाई लिएर समर्थन फिर्ता लिने काम गरेको आरोप लगाए।

‘सरकारको साझेदार भएर बजेट निर्माणका हरेक चरणमा भाग लिने, विरोध पनि गर्ने तर सरकार छोड्न नसक्ने अलोकतान्त्रिक खेल खेलियो।’

शाहले एमालेले आफ्नै सहभागितामा तयार भएको बजेटमा संशोधन प्रस्ताव ल्याएको भन्दै त्यसलाई सुदूरपश्चिमका जनतामाथिको अन्यायका रूपमा चित्रण गरे।

‘आफैँले ल्याएको बजेटमा संशोधन प्रस्ताव ल्याउनु भनेको सुदूरपश्चिमका भोका पेटहरूमाथिको प्रहार थियो। प्रदेशलाई अस्थिरतातर्फ धकेल्ने खेल थियो।’

बजेट पारित हुन नसक्दा सुदूरपश्चिम प्रदेश सरकार अहिले बजेटसम्बन्धी अन्योलमा छ। सरकार परिवर्तनसँगै नयाँ नेतृत्वले बजेट पारित गर्ने तथा प्रदेश सरकारको नियमित कामकारबाहीलाई गति दिने चुनौती सामना गर्नुपर्नेछ।

यसैबीच सुदूरपश्चिममा नयाँ सत्ता समीकरणको तयारी यसअघि नै भइसकेको छ। नेकपा र नेकपा (एमाले) बीच प्रदेश सरकार गठनका लागि सत्ता सहकार्य गर्ने सहमति भइसकेको छ।

सहमतिको आधारमा अब सुदूरपश्चिम प्रदेश सरकारको नेतृत्व नेकपाले गर्नेछ। नेकपा सुदूरपश्चिम संसदीय दलका नेता खगराज भट्ट नयाँ मुख्यमन्त्रीका प्रमुख दाबेदारका रूपमा अघि आएका छन्।

प्रदेश प्रमुख नजिर मियाँले नयाँ सरकार गठनका लागि आह्वान गरेपछि भट्टको नेतृत्वमा नयाँ सरकार गठनको प्रक्रिया अघि बढ्नेछ।

५३ सदस्यीय सुदूरपश्चिम प्रदेशसभामा नयाँ सरकार गठनका लागि आवश्यक बहुमत जुटाउने गरी दलहरूबीच सहमति भइसकेको बताइएको छ। शाहको राजीनामासँगै लामो समयदेखि चल्दै आएको सत्ता संघर्ष तत्कालका लागि नयाँ गठबन्धनतर्फ मोडिएको छ।

अब प्रदेश प्रमुखको आह्वान, दलहरूको समर्थनसहितको दाबी र नयाँ मुख्यमन्त्रीको नियुक्तिपछि सुदूरपश्चिममा नयाँ सरकार औपचारिक रूपमा गठन हुनेछ।

शाहको राजीनामाले प्रदेश सरकारको नेतृत्व मात्र परिवर्तन गरेको छैन, कांग्रेस–एमाले सत्ता सहकार्यको अन्त्य गर्दै सुदूरपश्चिमको राजनीतिक समीकरणसमेत पुनःनिर्धारण गरेको छ।

Originally published on abcnews.com.np.