रोल्पा । रोल्पाको थबाङ गाउँपालिका–५ कोटलबारामा अविरल वर्षाका कारण गएको पहिरोमा परी मृत्यु हुनेको संख्या १० पुगेको छ। पहिरोले स्थानीय बासिन्दाका घर तथा गोठ पुरिँदा दुई जना घाइते भएका छन् भने तीन जना अझै बेपत्ता रहेको नेपाल प्रहरीले जनाएको छ ।

पहिरोमा परी गम्भीर घाइते भएका दुवै जनालाई थप उपचारका लागि बुटवलतर्फ पठाइएको छ। जिल्ला प्रहरी कार्यालय रोल्पाले जानकारी अनुसार, बेपत्ता भएका तीन जनाको खोजी कार्य निरन्तर जारी रहेको छ।

मृतकको विवरण

पहिरोमा परी रोल्पाकै थबाङमा ज्यान गुमाउनेहरूमा १८ वर्षीया शान्ति पुन मगर, ६० वर्षका कमल बहादुर पुन मगर, ८० वर्षीया मनखना पुन मगर, ७५ वर्षका दल बहादुर पुन मगर र ८५ वर्षीया हस्तकला रोका मगर हुनुहुन्छ।

यस्तै, पहिरोमा बगेर छिमेकी जिल्ला प्युठानतर्फ पुगेको अवस्थामा मृत फेला पर्नेमा थबाङ–५ का ७ वर्षका अशोक पुन मगर, ३४ वर्षीय महेन्द्र घर्ती, ६६ वर्षीया मनि पुन मगर, ३४ वर्षीया विष्णु भन्ने जुन कुमारी पुन मगर र ८० वर्षीय बल बहादुर पुन मगर हुनुहुन्छ।

घाइते तथा बेपत्ता

पहिरोमा परेर २२ वर्षीय हिमाल पुन मगर र २५ वर्षीय संजय घर्ती मगर घाइते हुनुभएको छ। उनीहरूलाई प्राथमिक उपचारपछि थप उपचारका लागि बुटवल लगिएको छ।

यस्तै पहिरोमा परी ९ वर्षका अशिम पुन मगर, ८० वर्षका अजम्बर पुन मगर र ७२ वर्षका लिल बहादुर पुन मगर बेपत्ता हुनुभएको छ। उद्धार टोलीले उनीहरूको खोजी भइरहेको जानकारी दिएको छ।

Originally published on abcnews.com.np.