बागलुङ । अविरल वर्षाका कारण बागलुङका दुई राष्ट्रिय राजमार्ग शुक्रबार बिहानैदेखि अवरुद्ध भएका छन्। पहिरो र बाढीका कारण कालिगण्डकी करिडोर र मध्यपहाडी लोकमार्गको बागलुङ खण्डमा यातायात ठप्प भएको हो।

बागलुङ नगरपालिका–१३ स्थित कालाखोला बगरमा पहिरो खसेपछि बिहानैदेखि कालिगण्डकी करिडोर अवरुद्ध भएको छ।

त्यस्तै, मध्यपहाडी लोकमार्गअन्तर्गत बुर्तिवाङ–निसीखोला सडकखण्डको निसीखोला गाउँपालिका–४ कानाबजार नजिक ठाडाखोलामा बाढी आएपछि सडक अवरुद्ध भएको छ।

जिल्ला प्रहरी कार्यालय बागलुङका सूचना अधिकारी तथा प्रहरी नायब उपरीक्षक रामेश्वर त्वातीका अनुसार दुवै राजमार्ग खुलाउन सडक डिभिजन कार्यालय, मध्यपहाडी लोकमार्ग आयोजना र कालीगण्डकी करिडोर कार्यालयसँग समन्वय भइरहेको छ।

सडक खुलाउने प्रयास जारी

अवरुद्ध सडक तत्काल सञ्चालनमा ल्याउन आवश्यक उपकरण र जनशक्ति परिचालन गरिएको प्रहरीले जनाएको छ। पहिरो तथा बाढी प्रभावित क्षेत्रमा डोजरलगायतका उपकरण पठाएर सडक पुनःस्थापनाको काम भइरहेको छ।

लगातार वर्षा भइरहेकाले सडक खुलाउने काममा केही कठिनाइ भए पनि दुवै मार्ग यथाशीघ्र सञ्चालनमा ल्याउने प्रयास भइरहेको प्रहरीले जनाएको छ।

Originally published on abcnews.com.np.